陸羽仁 BLOG 2013年4月17日
大恐慌
2013/4/16 上午 07:41:50
網誌分類: 經濟
金價暴跌，開始觸動環球投資者的神經，加上中國首季經濟增長不理想，波士頓馬拉松終點又暴炸彈，炸散了投機者的心，美股大幅回落，杜指大跌266點，跌幅1.8%，終於來一個較似樣的調整。
都係先講金價。黃金雖受美元下跌影響，但其本質向來都係經濟及政治狀況的寒暑表，金價由2011年9月歷史新高1920美元，逐步回落，已經反映出全球經濟續步放緩的現狀，或者咁講，係全球投資者對經濟復甦的希望消失的反映。最新出爐的經濟數據，每論係服務業、就業市場、消費市場，瓣瓣都差過預期，加劇市場對美國以至全球經濟憂慮。上周五高盛將未來12個月的目標價由1550美元下調至1390美元，兼且呼籲投資者沽空黃金。金價急跌的另一個原因係，市場傳出塞浦路斯會沽出手持的40噸黃金儲備，以籌集5.2儀歐元，以換取歐盟的130億歐元救援資金。投資者憂慮其他財困國家都可能照辦煮碗，仲唔嚇到腳軟？
到昨日內地公布今年首季GDP增長由上季的7.9%下滑至7.7%，遠不及預期的8%，就踩多一腳。由於中國向來係全球最大的能源及黃金大消費國，中國經濟活力明顯變慢，商品、能源及金價更加缺乏承接力，金價昨日開市即跌穿1500美元大關，而且流血不止，跌至1355美元反彈，然後再跌，至今早執筆時已大瀉至每安士1353美元，一日內勁插近150美元，跌幅超過9%，連高盛的下調目標價都兩日內跌穿埋。白銀同時一日內大插10%，貴金屬散哂。
投資者瘋狂沽金，昨日朝早，黃金的交投量就已經達到42.5萬安士，超過平日交投量的3.2倍！金價暴跌，亦拖累其整個大宗商品市場。據Phoenix Futures 的主席Kevin Grady 觀察，唔少投資者沽出此前獲利的能源類商品去填補金屬商品的虧損。
一石激起千重浪，投資者對投資市場的恐懼感就好似漣漪咁擴散至股市。股市恐懼指標VIX指數昨日就由12點飆升至17.27，一日內抽高43%咁誇張。杜指全線下挫，收市跌266點至14599點，跌幅1.8%；標普500指數仲弱，大跌36點，造1552點，跌幅2.3%。創了今年最大單日跌幅。能源及原材料股跌幅最大，Exxon Mobil及Chrevon兩大油股齊跌2.8%，美鋁(Alcao)亦跌2.2%。全球最大的銅金生產商Freeport McMoRan Copper & Gold Inc勁插8.3%，黃金ETF更是9、10%咁跌。
至於後市走向，市場估計短期內仍會受制於金價去向。金價繼續瀉，大市唔會有運行。至於金價的支持位在哪？由於金價現時正自由下墜，分析員都唔願意給出目標價。而Kevin Grady則表示，根據斐波納契回撤理論(Fibonacci Retracement)，金價由2008年的每安士688美元升到2011年的1920美元，金價的下一個支持位係1300美元。不過，值得留意的是，市場正謠傳美銀美林今個星期五會有一個出售400萬安士黃金的大交易，美銀美林對此仍未有回應。想「撈金」的朋友不可不防。
唔係好多人有炒金，黃金大跌肉痛的人不多。但金價大跌顯示一個暴升的投資品，一出現恐慌，跌起來可以好恐怖，其他貴價產品，恐怕最後有同一命運，石油係一樣，樓價係另一樣，唔可以唔小心也。
陸羽仁
回應(84) 我想回應
陸羽仁 BLOG 舊文