金融High Tea 2013年5月3日
金融High Tea——這個五一真太冷
2013年5月3日
■TCL通訊受內地開展物聯網及5G開發帶動，喪升12.5%，圖為主席李東生。
環球經濟唔好，影響逐漸擴散，一個表徵係原油需求大減。美國商業原油庫存升至有紀錄以來最多，國際油價回落至每桶90美元水平，內地五一長假後開局麻麻，上證綜指收市微跌4點；恒指跌140點至喘定，之後跌幅逐步收窄，收市報22669點，跌69點，在美股杜指上日跌138點的背景下，港股都唔算跌得多啦。
中環茶友話，雖然美股近期好似唔理經濟係咁升，最近開始有少少乏力跡象，本周一上試高位時，未能穿4月11日的高位14887，最高只去到14844點，到周三快速回落，好似一個雙頂，若近期不能再破頂，美股可能有較大調整。
中石油A股創新低
論經濟香港和內地股無條件炒起，論水頭更同花旗國差天共地，所以人哋創緊新高，我哋話緊創新低，最無癮係隻中石油A股，在內地跌至8.4元人民幣，創上市以來新低。中石油H股(857)雖然唔至於見新低，昨日都跌2.1元至9.66元。見到中石油股份咁雞，想起佢2007年11月上A股前，股神巴菲特在同年7月開始沽中石油H股，沽貨價約11.3元，你睇股神計過條數要沽貨，中石油家都無運行，油價都有90美元，佢呢幾年只係上上落落。中國採購經理指數(PMI)唔好，掃低埋其他能源股和航運股，兗州煤(1171)跌3.3%，係表現第二差的國企股。
盲頭烏蠅炒電訊股
茶友話，經濟數據唔好，炒跌好正常，但電視股、手機股等卻喪升，TCL通訊(2618)喪升12.5%，晨訊(2000)大升10%，中國無線(2369)升7.7%，其他電訊設備股亦升。
呢一浪這幾類股份大升，和在內地上周公佈開展物聯網以及5G開發的消息有關，本地電訊設備股、手機股、手機設備股都大幅炒上。以TCL通訊為例，在一個星期前由2.3元左右起步，昨收3.51元，好快升咗44%，只能用一個狂字形容，個股價圖好似射火箭咁上。
茶友話，升得咁癲當然有大戶出手，見個市咁靜，失驚無神借阿爺的消息就發力狂炒，升第一日唔覺，升得幾日，好似有勢，就見散戶好似盲頭烏蠅咁追入，其實物聯網以及5G點搞、最後邊間公司受惠，真係無人知，烏蠅邏輯好簡單，總之人頭湧湧就係好嘢，大戶出手都好狠，連推幾日，就怕烏蠅唔埋堆。以TCL通訊為例，佢去年蝕2億，今年首季未有大起色，若然賺返大錢升好多都得，若然未掂炒完就散。散戶唔知人開大定開細，跟炒一定要腳底抹油呀，一唔得就閃。
國際金價暴跌，「五一黃金周」變成搶金周。好多金飾品早在假期前夕已被搶購一空，搞到不少旅客望門興歎，黃金周「一金難求」。有金店表示，營業額在過去一個月急升近七倍。凡是足金製成品，無論飾金、金粒都被掃走。
雖然本地多間珠寶金行人山人海。但似乎係旺丁唔旺財。六福(590)集團主席兼行政總裁黃偉常表示，五一假期間，前來光顧的客人以內地遊客居多，雖然當中不乏豪客，但生意已未如金價急跌時多，期內黃金落訂情況亦未見很大變化，或與金價近日反彈有關。假後金飾珠寶股都唔掂，六福跌2%，周生生(116)亦跌1.2%，英皇鐘錶珠寶(887)跌2.5%，佢哋股價同今個五月一樣咁冷。
陸羽仁
上一頁 下一頁
金融High Tea 舊文