金融High Tea 2013年5月30日
金融High Tea——地主有難
2013年5月30日
■一手新盤實施後屆滿一個月，有報道指幾乎所有樓盤上載樓書都被打回頭，搞到市場無樓賣。資料圖片
■朗廷酒店投資暗盤市場新報4.8元，較招股價5元，低0.2元。
昨日至講過「今個月港股走勢玩殘不少散戶，你估升時佢就跌，你估跌時佢就升。」港股昨日又玩投資者一次勁嘅。
跌市主要由地產股帶動。恒生地產分類指數勁跌近3%，遠遠落後大市。藍籌地產跌幅顯著，新地(016)及恒地(012)齊跌2.4%，信和(083)挫3%。
隔夜美股受經濟數據理想推動，杜指大升106點，內地A股升至兩個月高位。當大家都覺得港股昨日「實食無黐牙」，恒指偏偏低開102點，之後彈都唔彈，午後仲來個大滑水，搞到遍地眼鏡。恒指收市大跌369點至22554點，近全日最低位收市。兩日埋單計數，輸多140點。成交則增加至638億元，沽壓明顯大增。
無樓賣搞跌個市
本港地產股無論係發展商抑或收租公司，都無一倖免下跌。賣樓股好似新地、長實(001)滑落，主要係一手新盤實施後屆滿一個月，有報道指幾乎所有樓盤上載樓書都被打回頭，搞到市場無樓賣。
有人埋怨，現屆政府想推低樓價，幫人賣樓，各種干預措施齊出，結果樓價終於煞住，但高位無乜點跌之餘，最慘係多咗好多限制，搞到買樓仲難過以前。有分析則認為，外圍環境，特別是美國經濟及就業數據好轉，美國聯儲局退市，收水傳聞發酵，令到上車客擔憂供樓負擔上升，影響入市意欲。
公道啲講，新盤賣樓限制係上屆政府已經搞咗，而家只係落實，呢個故事教訓係，政府做嘢要好長時間，由推動政策到落實，往往客觀環境已經大變，市民感覺會唔同咗，追逐民情去施政，好易變得太民粹，最後得出反效果𠻹。不過，新例搞到無樓賣，相信只係一時適應問題，遲啲就會無事，真正影響反而係以後賣樓少咗好多花招可以出，難度增加咗，對地產代理而言，活動空間大減，難免影響今年賣樓成績。
分拆酒店朗廷上市的鷹君(041)勁插超過6.5%，朗廷酒店投資(1270)明日掛牌，據輝立資料顯示，朗廷酒店在暗盤市場新報4.8元，較招股價5元，低0.2元，幅度約4%。暗盤總成交只有59.3萬股。
朗廷酒店投資發行8.5億個單位，認購相當於公開發售超額10.7倍；國際配售獲溫和超額。今次申請人人有份，如果個市唔好，就有可能損手！今年賣樓唔易，好多公司趁房託有價分拆物業上巾，鷹君行最快，好世界，跟住仲有合和(054)、新世界(017)，佢哋反應好壞，就睇朗廷表現掂唔掂。
收租佬環境有變
更值得留意係呢次地產股跌，收租股一樣無得避。過去地產股調整，主要係發展商跌得多，但睇番昨日，龍頭地產股九倉(004)一口氣跌穿70元大關。早排個市反彈，九倉仲係龍精虎猛，跑贏大市，但今個星期回得好急，唔知係咪同高端消費品頻傳利淡消息有關。
中國總理李克強日前訪問瑞士，雙方達成自由貿易協議，降低大家關稅，瑞士鐘錶自然納入受惠行列。雖然措施分期執行，未來幾年對本地奢侈品銷售影響唔大，但多少帶來心理影響。
今年高端消費品市道放緩之聲頻傳，黃金地段商舖租金有見頂之勢，令相關股份外脆弱，一有風吹草動就有獲利盤沽出，收租股同房託過往被視為穩陣收息對象，但一本通書不能睇到老，無論持有或想兜底執平貨者都要留意時勢係咪變咗！
陸羽仁
上一頁 下一頁
金融High Tea 舊文