金融High Tea 2013年7月15日
金融High Tea——熔化與過剩
2013年7月15日
最近呢兩個幾月，全球都俾聯儲局主席伯南克玩死，早前講出收水時間表，到上周又講到無咁快收水，金股匯都隨着他的口技而起舞。
我同一個金融界前輩講起呢個話題，佢話美國利息和資金供應的走勢，從來都主導全球股市，聯儲局在經濟衰退時放水，在經濟過熱時收水，係正常行為。在收水初期，由於經濟走勢還在向上，企業營收還在增加，所以股市仍向好；隨着加息收水潮愈演愈烈，股市就唔掂。今次美國超常地大放水，所以唔可以等到通脹急升時才收，理論上在經濟企穩時就要開始收，以防止吹出巨大的資產泡沫。前輩認為要留意美國開始收水，對環球資產市場的中長線影響，拉長嚟睇，「升咗的就要跌番」(What goes up must come down)，黃金就係咁，黃金不產生利息收益，上升純因為美元印得太多。到美國減印美鈔，黃金就見頂回落，當然跌得多時會有一浸浸反彈，但即使出現巨大反彈，只要美國收水的方向持續，特別是美元開始加息時，黃金最終會反覆向下，打回原形。
我加把嘴話，美國早半年遲半年開始收水，對炒股者影響都好大。本來聯儲局主席伯南克係放水大鴿派，照計唔想咁早收水，但目前睇佢明年初離任的可能性好大，他是學者出身，本身就係搞呢啲放水理論，如今係攞美國來做一個大實驗，若然他部署離任，過去放水咁多，若無收水計劃，離任後一定會被人翻舊帳話佢識放唔識收，所以佢就事先講出停止買債時間表和路線圖，並暗示會在今年下旬開始減買債量，分明就是想為自己的離任留下一個完美的結局。所以大家要預咗聯儲局可能在9月或稍後開始收水，會減低買債量，例如將每月買債數量由850億美元減至600億美元。
睇穿花招 玩收水市
本來聯儲局減一點買債量，其實每月還大量印鈔，按理沒有大不了，但金融市場捉大方向，一開始減印，很可能是一個收水大浪潮的開始，所以資金好可能大力倒轉炒，影響會好大。故此伯南克家是採取一個「行三步退兩步」的方式，來引出聯儲局收水的方向，以減輕市場的震盪，管理市場的期望，減輕收水的衝擊。我們不要被伯南克一時一樣的說法誤導了，綜合觀察，開始收水的大方向已定出來了，我哋要睇穿佢的花招，預備「收水市」的到來。長線投資的策略是避開一眾因美國放水而大升的資產，房產、黃金、外匯等市場，都可能逐漸漏氣，當然，他們的下跌也非直線下跌，跌得多可以大反彈，但如果美國分三、四年將資金供應狀況打回原形，這些資產都好可能反覆打回原形。
美國自5月開始講收水，妙就妙在對美股影響好細，美股上周還創出新高，但對新興市場就有好大打擊，自5月1日起計，中國股市跌了6.3%，這還不算多，有些新市場如土耳其的股市同期跌20%以上。美國收水，美元趨升，資金就從新興市場流走，回流以股市為主的美元資產市場。
中國數差 出招托市
中國過去4年經濟政策的缺失，主要源於2008年秋季溫總理開亞太經合組織會議時，遇到美國高官，美國高官話美國出現熔解性的經濟危機，將會大放水救市，叫中國也放水刺激經濟。溫總受晒，回國就搞4萬億救市，結果搞出超級通脹，搞出虛胖的經濟，搞出過剩的產能。到現屆政府上場，就要控制信貸減肥，重整產業結構。
雖然中國經濟和股市急促下滑，疑似政府的「暴力哥」在內地入市掃貨，托番起A股，總理李克強也出口術話要保經濟，但我懷疑這些動作主要為上周四公佈6月出口跌3.1%，以及今日公佈的GDP經濟增長數字護航，因為數字太差，政府唔護盤股市會暴跌。但護盤過後，政府亦不似會大力放水救市，反而會繼續進行控制信貸的「李克強經濟學」(和日本大力印錢的「安倍經濟學」相反)。政府不會出勁招救企業，部份經營差劣的內地企業的半年結會好肉酸，盈警會繼續湧現(上周五就有十幾間公司發盈警)，個別頂唔順的企業甚至會爆煲，結論係內地經濟和股市不會「馬上好」。
最近熔盛重工(1101)出事，就係典型中的典型。熔盛是民營的造船業巨企，2005年創辦，係中國三大造船廠之一(其餘兩家是國企)，一度以接單量計是全球最大造船企業，超過南韓的對手。佢在2010年11月以8元的招股價在港上市，數字說明問題，佢近日跌到「阿媽都唔認得」，上周低見0.75元，上周五收市價0.81元，即係話上市買佢到家，得番十分之一，熔盛500股一手，如今一手只是405元，5舊水，買咗唔識得走喊都無謂。
觸發熔盛最新一輪急跌，皆因月初已傳出好多熔盛找唔到數出唔到糧的傳聞，後來佢出通告話，銀行和其他金融機構已緊縮對造船企業的信貸安排，造成船東延遲或拖欠造船商款項，對於集團營運資金造成壓力，近期已延遲向供應商及工人付款，以收緊公司現金流出。消息一出，等如證實了壞消息，熔盛股價在本月5日應聲急跌16%。佢股價早已由40樓跌到8樓，呢次暴跌潮只是由8樓插落4樓而已。
熔盛出事 鑊大難救
熔盛的災難亦好易理解，佢在2005年中國經濟需求旺盛時創辦，短短5年已躋身全球行業前列，在造船這個傳統重工行業，而不是高科技或創新行業，這種規模自然係靠關係加資金搭建起來，熔盛大股東張志熔是推銷一個中國挑戰南韓造船業、成就世界第一的故事。但客觀點去看，熔盛這個新企業的發展，就好有拔苖助長的意味，在2010年更上埋市，再找到新資金去頂，在環球貿易在金融海嘯後急促放緩的情勢下，航運業不濟的大環境下，逆流再上。
大家不要忘記，2008年美國爆金融海嘯，觸發歐洲也爆債券危機，美國大放水救市，似乎只是救起投資市場，未大幅救起以美國為首的環球實體經濟，歐美貿易需求咁弱，航運業造船業邊有運行。我聽大型船公司負責人講，如今船費加價，皆因油價高企，若不加價出一隻船蝕一隻船，所以情願加價出少啲船，以維持出船還有毛利，船隻過剩的情況可想像而知。內地船泊業協會預測，在全球船舶過剩、定單難求的情況下，在未來五年內，中國1600家造船廠，將有三分之一會面臨倒閉。
熔盛大股東張志熔自然睇到個勢，2010年底熔盛上市時，張志熔本來持有熔盛股份逾50%，後來先後將大量公司股份轉讓予公司管理人陳強，令陳強持股增至16.7%。張志熔又無代價轉讓公司11.4%股予父親張德璜，多次大手減持後，張志鎔將自己持股減至29.3%，不再是熔盛控股股東，兼且在去年11月辭去公司職務，金蟬脫殼的動作明顯，似乎想與熔盛分割，有問題都不會燒到自己身上。
造船業生意前景短期內不會好轉，熔盛面臨巨大資金壓力，一路蝕錢，一路要搵資金填這個大洞，照正路睇佢融資會愈來愈難。美林美銀預期，熔盛2013年及2014年淨負債比率將升至146%及162%。
熔盛這個名字，拆開可以解作熔解與過剩，是產能過剩的熱門行業的寫照，資金鏈一斷，企業就會熔解。市場可能期望政府會救，但熔盛是歷史咁短的民企，阿爺當年都要粵海這家國企重組，為何民企不要重組就會救助呢？若救得熔盛，是否所有大型企業出事都會救呢？這些都不是易答的問題。
熔盛事件帶來幾點，第一，內地企業經營轉差甚至爆煲的問題將陸續浮現，不要期望內地股市馬上好起來。第二，買熔盛新股的教訓是要止蝕，對一家沒有太長歷史和上市往績的公司，面對如此的行業劣勢，怎可以見佢跌而不止蝕呢？第三，如果呢類股份博反彈，賭博成數好高，最大風險是突然停牌，要進行漫長的削股談判，即使重組成功，唔使倒閉，到復牌時股價都可能再無一大截。大家睇路呀。
陸羽仁
上一頁 下一頁
金融High Tea 舊文