青心直說：中電唔該磅水 - 胡孟青
■中電有錢，唔該順便資助一級能源效益電器。
炒鬼最高興不勞而獲，可以輸打贏要就更理想。講到老屈，有甚麼好得過向公用事業埋手，這盤生意竟然能有錢賺，已經等同犯罪，要面對團體批鬥，若不想將來每次公佈業績有人送盆桔，唔該速磅3億，一家便宜兩家著數，你有平安，我有track record. 你肯交保護費，唔係，應該叫「資助節能費」，每度電當1蚊，幫你計盡一年慳3億度，達到1%節能目標，唔好理我條數點計，總之速磅！畀錢！冇價講！你盤數在明，我在暗，總之就係望住你份財務報表計出來，明知你一定畀得起。
你要知道，換了是匯控(005)、渣打(2888)，肯定已不止此數，還要是美金過數，人家收買路錢，都美其名為罰款啦！我話之你要真金白銀回饋股東，我這群塘邊鶴，也覺得應該獲「回饋」，誰叫你賺大錢！你的所謂服務承諾，如穩定供電，本來就是你的份內事，我要的是你的不加價承諾，你不給我這個承諾，包你大喊前世唔收，我們的宏願是你今世唔收、下世都唔收(電費)。
資助慳電產品
你竟然仍懂知慳識儉，上半年香港業務營運盈利升5.5%至34.17億元，但你已經成110歲，仍老而不死，留這麼多錢，難道要拿來陪葬不成？我話之你澳洲業務盈轉虧，總之休想我放過你。
你一直著眼於向公眾進行慳電教育、節能工具與技術支援，我也明知開高一度冷氣，再用電風扇室內送風可慳電，但為了3億，我可以視而不見，聽而不聞。綜援戶已有納稅人支援，既然中電(002)有錢，唔該順便，資助一級能源效益電器，開盡都免交電費的，才謂之一級。一句講曬，畀定唔畀，後日之前答覆，但你根本冇權選擇，但就算你肯畀，我都唔會寫包單，承諾一定慳到電，你都知啦！總之，一口價，未來五年，每年3億！
胡孟青
獨立股評人
講電影變講國情，阿澤彭導最後一星期做嘉賓，
未睇？即上《亂?24》重溫！
http://bit.ly/appletalk24
上一則: 財智語陸：港股大條道理炒上 - 陳永陸
下一則: 投資一周：有眼不識泰山 - 周顯
青心直說 - 胡孟青 舊文