金融High Tea 2013年9月19日
金融High Tea——超人發功馬上得
2013年9月19日
港股緊貼內地A股先跌後升，但等到A股收市後腳軟跌番落嚟，恒指收市跌63點，報23117點；國企指數跌62點，收10588點，全日成交只有502億元，在聯儲局決定收唔收水的前夕，大家都唔想輕舉妄動啦。
大市沉悶，地產股則表現標青，恒生地產分類指數逆市升逾1%，全靠李超人發功。超人即係超人，在適當時候就出招。前日長實樓神趙國雄本來約咗報館老總食飯，點知大老闆李超人突然殺到，仲要好有興致同老總們暢談各類問題。雖知李超人近日在長和系出業績都無出來，突然現身仲肯講咁多嘢，老總們自然喜出望外。
無彈特首畀面阿爺
李超人呢次「偶遇」，自然係早有安排，佢有點想講，原來係刻意澄清，叫市場不要「鑽牛角尖」，想得太多話佢哋撤資，商場上必然會有賣有買，出售百佳資產純為商業行為，事實上，長和系今年3月還透過新加坡上市公司和記港口信託以40億元收購葵通的亞洲貨櫃碼頭。李超人話，只賣了百佳，唔講得上撤資，如果連總部長江大廈都賣埋，大家才需要擔心。
李超人稱生意規模的大小，會隨住香港及世界的政治和經濟情況而作出決定，又提醒港人上海自由貿易區對本港影響大，若不急起直追，香港將落後於人。
陸羽仁諗嘢較政治化，長和系之前賣咁多嘢，點講都係一個姿態，表達一點不滿。但政治無永遠敵人，講掂咗數就無事啦。我留意李超人講話第一無彈振英哥，甚至對發展商好不滿的雙辣招都無好正面攻擊，講埋兩句反佔中，都算畀足面阿爺囉。
李超人一發功，長和系馬上得，長實昨日急升3%至120元，和黃亦升0.5%，收92.85元。長實本身業務集中香港和內地，若然撤資唔知撤邊科，自然令投資者比較忐忑，所以李超人的澄清對長實最正面。
講番賣百佳，似乎繼續去，市場估值介乎234至312億元。經三輪競購，由台、法合資的高鑫零售(6808)已經出局，入圍的潛在買家，現時餘下四個，除了有阿爺背景的華潤創業(291)，還有泰國首富謝國民旗下的卜蜂集團、永旺(984)母公司日本AEON集團，以及澳洲連鎖超巿營運商Woolworths。
華創手窒無意高追
市傳放盤結果最快9月底公佈。四個潛在買家之中，表面睇在本港擁有華潤萬家超市的華潤創業熱熱哋，但收到風話華創興趣不濃，出價不進取，未符合和黃心意。百佳誰屬仍是未知之數，但若然出售一定是好價，對和黃有啲支持。
港股升勢有少少疲，銀行股想回想回咁款。花旗昨日發表研究報告，指當周邊市況波動，投資者大可將本地大型銀行股視作「避風港」，原因係本港銀行結構性受惠於利率上升環境，短期而言，長息升幅高於短息，能受惠於財資業務收入提高；長期而言，短息上升則可擴闊存款與拆借息差。
我就話息差的確有機拉闊，但樓市呆滯按揭生意唔好，對本地大銀行有壓力，渣打(2888)升1.2%至186.5元，樓按大戶中銀香港(2388)跌0.2%，大笨象匯控(005)靠穩。中小銀行就回吐，昨日炒收購概念升到癲的中小銀行跌幅較大，其中東亞(023)急挫4.5%，將前日升幅跌番晒出街，前日勁升近四成的永亨(302)跌2.3%。呢啲收購潮好難炒，啲小中銀行股好似坐過山車咁，高追又係傷。
陸羽仁
上一頁 下一頁
金融High Tea 舊文