金融High Tea 2013年9月9日
金融High Tea——炒炒周期股
2013年9月9日
上周五美國公佈8月新增職位只有16.9萬個，比市場預期的18萬個低，美股早前先跌後彈，但香港上周五夜期卻升131點，較恒指高水202點，可能是炒美國8月就業數據唔標青，聯儲局9月收水的機會下降。但高盛卻認為，8月就業數據無咁理想，但都未疲弱到可以阻止聯儲局9月收水的地步，不過可減少收水幅度，估計聯儲局9月會決定象徵式收細買債額。
其實呢一輪美股因為擔心敍利亞開戰和聯儲局收水而回軟，但港股都幾強，上周升4.1%，向23000點進發，可能過去增持咗現金的基金，見中國經濟數據好轉，不再有硬着陸危險，就增持番啲紅色股，令到港股脫離美股回軟的走勢，反覆向上。
呢啲市除咗睇大市方向之外，還要睇大市口味，基金佬買貨有兩種傾向，一種是跟美國的大勢(例如對高息股的喜惡)；另一種是對紅色股的獨有看法(例如隨着對中國經濟硬着陸的判斷去揸或沽內銀股)。基金佬對一種類型股票情有獨鍾時，這類股份表現就會較大市為佳；基金佬唔喜歡一類股份時，呢類股份就無運行，呢種口味變化其實源於美國股市的炒作大勢，值得仔細參詳，最近美股口味的變化和息口向上及經濟恢復有關，兩者二而為一。
債息向上息股當災
美國國債息率不斷攀升，肯定是市場上某部份股票的最大殺手。事實上，美國10年期國債息率，由5月1日時的1.63厘，一度升至上周的3厘，現在還停留在2.8厘樓上的高位，令市場對息口的觀念完全改變。美股整體仍在攀升，但其中幾類股份已始受壓，若債息持續向上，預計負面影響逐步擴大。
我估計若聯儲局在9月中決定輕微收水，升咗咁多的債息會有一次較顯著的下調，體現好消息出貨的特質，但債息下調補回上升裂口後，長線仍將向上，以配合聯儲局逐步退市的大趨勢。
債息飆升，受影響最大的係性質與債券接近的高息股，包括公用股(電力、煤氣、電訊股)和房託股。過去幾年債券利息不斷下跌，投資者不想買債券，轉買高息股，買這些股票主要係貪佢哋息口高，股價升唔升不是主要考慮，股價不變，長派高息，投資者已很滿足。但如今利息開始上升，高息股的唯一優勢就會淡化，當債券息率升到同高息股差不多時，投資者就會將股票換馬到比較安全的債券，10年期國債有3厘息，公用股又係3厘息，問你你買邊一隻？睇番美國這類股在5月到8月的表現，公用股及電訊股在大市上升期間逆市跌了超過10%，有些個股例如FirstEnergy更大跌21%。
房託急跌流血未止
香港的高息股，如公用股及房託股都有類似情況，穩陣如中電(002)由5月高位69.9元，到依家只有62.65元，跌了10%；電盈(008)由5月中的4.21元，跌到依家的3.49元，跌咗17%；房託股領匯(823)，5月高位46.4元，依家34.45元，大跌25%！
我早前向大家示警，話小心利息向上領匯仲有得跌時，佢當時仲有38、39元，轉眼已唔見多一大截。越秀產託(405)由高位4.91元跌到依家3.98元，亦唔見了18.9%。當中最弱的是領匯，其他股份近期都有少少反彈，領匯還在創低位。同期恒指由5月高位回落不足2%，可見高息股跑輸大市幾多。
題外話順帶講一句，唔好成日記住呢啲股份的高位，佢哋個高位係在美國10年期債息得1.63厘時做出來，將來美債好難去番這樣低息，高息股唔會自然而然升番上呢啲高位，只有個別股份盈利夠好派息上升得夠多，才可以再上高位，唔係隻隻得，所以唔好迷信曾經出現的高位。
另外，美國債息上升，帶動美國按揭息率上漲，令美國買樓成本增加，30年定息按揭利息升咗1厘有多，直接影響美國人買樓意欲。美國多家大型建築商股價，5月至今跌幅顯著，其中DR Horton更跌了超過30%；Pulte Group亦插水27%！
香港地產股的情況和美國有點差別，樓市之衰不是因為息口而因為政府干預，先有賣樓雙辣招；再有嚴格的賣新盤新例實施，發展商4月後叫停晒新盤開賣，直至近期才恢復。地產股的高位和公用股不同，它們的高位不在5月美國最低息時出現，而是一早已見頂回落，新地(016)的高位已遠在1月的130.8元，第2個高位是4月的115元，現在只有102元，現在比1月高位唔見咗22%；比4月高位亦跌咗11.3%，以5月後跌幅計，仲衰過其他收息股。
美國國債利息向上影響咗美國按揭利息，但香港資金充足，銀行同業拆息無大升，按揭息率無郁，所以美國利息上升暫時好似唔關香港地產股事，遲啲就難講啦。短期而言，隨着新盤開售情況OK，例如長實(001)上周六開售荃灣昇柏山，首日都賣到200伙以上，地產股還可能再有反彈，但到按揭利息向上時，地產股又會回落。
網科狂炒源於美國
利息向上令美國收息股和地產股唔掂，但有些股份卻在利息上升或經濟回暖中受惠，這些股票都屬於周期性較強、對宏觀經濟比較敏感的股份，有不少人相信，利息上升係由經濟改善所帶動，所以會投資那些周期性較強的股份，認為佢哋會食到經濟改善呢條水，這些股票包括科技、電子產品、汽車零部件、能源、原材料股以至航運股。
最誇張的是科網股。我哋睇本地科網股王騰訊(700)由今年4月低位237元升到依家387元，大升63.3%，咁大隻股咁短時間可以升成咁好令人意外，其實呢個情況不是香港獨有，美國一模一樣，甚至幾肯定呢個炒浪由美國觸發。
美國的科網股大升，個故仔係咁，經濟好轉，加大對科網產品的消費和投資，所以睇好科技股，好似谷歌(Google)由4月低位升了15.7%，在美國上市的中國搜尋器龍頭百度仲勁，由7月低位90美元，急升到依家135.67美元，大升50.7%，升幅和騰訊有得揮。不過騰訊、百度是科網強股，升幅卻唔夠弱股新浪網咁多，新浪股價由4月低位46美元，升到依家的80.55美元，升咗75%，竟然勁過百度、騰訊！
我估美國炒科網股，係見到內地科網股細細隻容易炒，就落注追貨。新浪市值53.7億美元、百度市值474.5億美元、谷歌市值2930.9億美元，證明炒作時唔係睇盈利，係睇市值，愈細隻愈易炒得高。騰訊市值7192億港元，即係928億美元，無怪乎可以炒得勁過市值2930億美元的谷歌，但係升幅少過細細隻的新浪。
如果你覺得騰訊44.6倍市盈率好貴，新浪去年營運虧損855萬美元，計及投資收益去年亦只有3170萬純利，無錢賺的新浪升得多過去年賺16.4億美元的騰訊，就係因為細細粒容易炒。所以騰訊又會升得少過市值216億的金山軟件(3888)，騰訊由4月低位升咗63%，金山同期可以升咗157%，咁你又點可以從股份強弱去解釋呢？
炒周期轉航運股熱
科網股在美國在香港甚有鑊氣，香港炒科網股都只係跟美國尾而已，不過科網股已炒到咁高，進入風險和回報同時偏高的狀態，唔係唔可以炒，但要轉身好快先至好去炒。
若然要炒周期股，又引用炒績差股的原理，一眾資源股和航運股都有炒作空間，炒經濟周期翻轉，股愈衰反彈幅度可以愈大，近期航運股彈升就係咁樣炒。當然萬一當個炒作勢頭翻轉時，至緊要走得快，走唔切可以輸死你，因為佢哋的業績其實可能有排都未翻身，只係炒佢哋有翻身概念而已。
穩陣一點的周期股，反而係創科(669)和德昌電機(179)這一類大型周期工業股，當中升得少係德昌，12.8倍市盈率，息率2.1厘，現價5.33元，從7月低位4.4元反彈了一些，但中期走勢都只係上下波動，無大升幅。德昌做汽車摩打仔，歐洲市場大過美國，若然歐洲經濟復甦，佢會受惠。但呢類股份的好處亦係唔好處，波動無咁大，風險無咁大，買咗要等好耐，不夠你炒航運股走一轉，唔啱鍾意股份一買就升的散戶玩。
陸羽仁
上一頁 下一頁
金融High Tea 舊文