陸羽仁 BLOG 2013年10月24日
礦業唔得
2013/10/24 上午 09:32:41
網誌分類: 經濟
昨日有多家美企派成績表，當中好壞不一。機械商卡特彼勒(Caterpillar)財報令投資者感到失望。卡特彼勒第三季度收入及盈利都差過預期，盈利9.5億美元，較去年大跌44%，公司更下調全年收入預期至550億美元，較此前預估的560億至580億美元低最多13%！每股盈利調低1美元，由6.5美元調低到5.5美元。
卡特彼勒股價昨日急挫超過6%，收83.76美元，係表現最差的杜指成份股。佢今年2月頭衝到近100美元關口，最高見過99.76美元，美股創哂新高，佢仲比高位低16%，嚴重跑輸大市。機械商業績係經濟的晴雨表，佢地業績唔好代表經濟有少少問題，今次卡特彼勒業績咁差，主要因為礦業冧市，令採礦需求大減。
一葉知秋，礦股未掂，都係唔好掂咁多為尚。
卡特彼勒唔得，但有另一隻成份股波音飛機，大升5.3%，頂住大市。世界最大飛機製造商波音第三季度表現剛好與卡特彼勒相反，營收利潤都超市場預期，分別增長10%及12%，波音更上調全年利潤預測。顯示航空業經過長久衰退後，航空公司終於要買番啲飛機。不過大陸航空公司深受高鐵競爭，唔好咁快睇好佢地。
美股連升五日後，昨日回軟。杜指全日在大約50點的跌幅橫行，收市跌54點，報15413點，標普跌8點至1746點。歐亞股市下挫，中國股市更跌至兩星期低位，市場氣氛認真差勁。不過美股升得多，仍然回得少，至昨日為止，標普500指數今個月仍有4.4%的進賬，表現異常硬淨。
有分析解釋，一來係上日公布的美國就業數據唔得，市場對聯儲局延後「收水」的預期升溫，聯儲局唔退市，美股就唔會大跌。港股後向要睇大陸個市掂唔掂，估計仲要捱一兩天。
陸羽仁
回應(2) 我想回應
陸羽仁 BLOG 舊文