陸羽仁 BLOG 2013年12月4日
要穩贏
2013/12/4 上午 09:35:22
網誌分類: 經濟
美股又遇上少少「收水驚恐症」，不過病情唔太嚴重，好似係感冒唔係肺炎。美股連跌三日，不過累積跌幅唔大，離最高位唔夠1%。杜指昨日跌95點至15914點，標普500指數跌6點，收1795點。
美股整體跌幅唔大，但個股的寬幅指標(Breadth indicator)就唔係幾靚仔，上升(收市價高過開市價)與下跌(收市價低過開市價)的比例連續幾日都係3對2。而股市恐懼指標VIX指數升上14.55點，係個半月以來高位，表示有更多人願意為後市下跌買定期權做保險。不過，相對來說，美股比歐股仍更硬淨。歐洲連跌兩日，跌幅大好多，法國股市兩日跌了近2.7%，分析估計係投資者一面等待今周的經濟數據，一面憂慮經濟數據有明顯好轉，促使聯儲局提早退市。
CNBC的房地產專欄在昨日報導，有唔少美國人在昨日的「周一網購日」，唔搶購平板電視或者咖啡壺，而係「搶購按揭利率」。這些人包括做二按的以及置業的人。美國現時最多買房者購擇的30年期固定按揭利率為4.5厘，而一年前只係3.36厘。
CNBC的房地產記者Diana Olick指出買房者決定幾時按揭利率，其實等於賭博，不過以現時情況睇，利率上升的機會遠遠大過下跌。至於點解買房者要急於在今個星期初搞定？MND的運作總監Matthew Graham解釋，今個星期美國將有好多重要經濟數據出爐，美國今昨將公布新屋銷售、製造業以及工資數據，明天公最新一周首次申領救濟金人數。尤其重要的是周五公布的非農就業報告，「投資者唔想因為就業數據好過預期，利率大跳升，而因此付出高昂利息。」
Zillow的 總裁Spencer Rascoff則指出，利率亦可以向下走，不過空間唔大，因為從利率走向的大勢睇，4.25厘可以講係已經觸底，4.5厘與4.25厘分別看似好細，但投資者亦要留意。他指出大多數的美國置業者都唔明按揭利率的重要性，只關注屋價將會漲到多少，例如係30萬或者31萬美元，有時無留意固定利率4.5厘與4.25厘其實長線分別好大。
新鮮出爐的諾貝爾經濟學獎得主席勒 (Robert Shiller) 上周六接受《巴隆週刊》訪問時話，目前美股經景氣循環調整之本益比 (CAPE) 約 25 倍，雖略高於歷史平均的約16 倍，但仍不到剔除美股投資等級地位的危險水平。不過他補充，由如果美國經濟力道仍然脆弱，金融及科技類股價格皆已高估。美股繼續上漲，CAPE 一旦觸及28倍，就開始令人擔心，美股亦開始失去吸引力。
另外，他又點名巴西的里約熱內盧及聖保羅兩個城市，過去5年房價「巨幅」漲勢，宛如 2004 年美國房市泡沫膨脹翻版，而全球對抗泡沫的能力仍非常脆弱。
睇完利率低企，不少地區樓價高升，又要講番兩句信用咭利息。網友依家控股有此留言:「老師話還卡數好緊要係啱，不過好多老散唔係咁睇，以家父為例，佢會以為買股贏五倍十倍好容易，又覺得個個月還min pay(最低還款)係好少錢，以借50萬「萬應錢」為例，個個月淨係還息都係五千蚊而已，好少錢者，五十萬買中隻股一win起碼過百萬啦。」
萬應錢利息已比信用咭低，但以依家控股老豆呢個例子，借50萬月息5000元，一年6萬利息，即係12厘，12%呀! 你搵隻股年年實賺12%俾我，我地可以齊齊瞓身啦!
炒股一時、一事，可以好大回報，但同樣地可以輸好多錢，回報不穩定。網友提起好多年前有「股神」碌爆咭跟真股神巴菲特買中石油，短線炒吓可能得，長線又得唔得?當日股神玩完中石油在10元樓上走咗，而家中石油都係9元，問題係佢買得平、走得快，散戶得唔得? 在大牛市股市日日升的時候，會出出好多股神，因為盲俠都係股神，你夠勇就可以贏錢，但呢啲大牛市三五年才見一次，而家唔似係咁，借咭數炒股，發咭銀行一定贏，你做借錢嗰個，好似打拳一入場先俾人打斷一隻腳咁，才上擂台比賽，唔係話你一定輸，如果你好似葉問咁好工夫，單腳打都會贏，但一般人就輸多過贏。
買股若睇長線，要尋找長期有收穫的策略，唔係贏一場半場，年紀愈大，搵呢個策略愈緊要。
陸羽仁
回應(5) 我想回應
陸羽仁 BLOG 舊文