陸羽仁 BLOG 2014年1月30日
連續收水
2014/1/30 上午 09:37:34
網誌分類: 經濟
美國聯儲局昨日一如市場所料，進一步減少買債，每月買債量由750億美元再減至650億美元，美股應聲下跌，杜指跌189點。
有分析用「精神分裂」來形容美股近期的表現。話去年12月，市場預計聯儲局打出退市第一鎗，投資者會嚇到腳軟，美股唔多唔少都會受到衝擊。但結果卻係美股連升幾個星期，投資者好似完全忘記了一直以來對退市的擔心。至於昨日，聯儲局同樣係宣布減少100億美元買債規模，而分析員普遍都認為聯儲局進一步退市，係對美國經濟信心十足的反映，點解投資者卻驚到沽貨沽唔切?
我認為關鍵在於聯儲局聲明的態度，對美國經濟復甦有信心，是一種強勢表現，令人相信聯儲局會連續收水。聯儲局的聲明差不多和上次無變，對經濟前景睇法無變，乜都無變。問題在於無變。
市場見新興市場爆到咁大鑊，期望聯儲局會幾句密切新興市場狀況，等如暗示吓如新興市場情況太差影響美國的話，會暫停收水，或者至少講句「近期市場波動」之類，點之一句都無講，這是有信心的表現，聯儲局相信美國經濟可溫和復甦，它會繼續收水(tapering)，但不會加息緊縮(tightening)，所以美股跌的同時，債息無升，十年期反而是兩個月以來首次跌穿2.7厘，債市炒家相信加息還很遙遠。當然，經濟溫和增長不是強勁增長，通脹不會升得太快，也是債息定下來的另一個原因。
由於聯儲局再收水兼完全無理新興市場的狀況，這對新興市場是一個利淡消息。新興市場ETF在美國普遍以低位收市。
繼土耳其央行大幅加息後，南非央行昨日亦宣布要對抗當地貨幣蘭特因持續貶值造成通脹風險，決定由今日開始加息半厘至5.5厘。土耳其里拉昨一度反彈近4%，但頂唔夠15個小時，到歐洲股市時段倒跌，其他新興市場貨幣亦轉升為跌。
有分析指出，美國經濟好轉、聯儲局收水，全球熱錢縮水。此前土耳其、巴西、印度、南非及印尼等受惠熱錢流入的新興市場，自然成為抽水熱點，成為大摩口中「脆弱五國」，愈依賴熱錢起家的國家就愈遭殃。
睇完聯儲局議息結果，我愈相信佢會每次會議減買債100億，到年底終止買債計劃，未來幾個月市場就會反覆消息此變局的影響。
(另外未來放幾日假，我先預祝大家馬年好運啦!)
陸羽仁
回應(6) 我想回應
陸羽仁 BLOG 舊文