金融High Tea 2014年1月14日
鐵底磨穿
2014年01月14日
歐美股市等候耶倫(Janet Yellen)接手聯儲局主席後的貨幣政策變化，好淡爭持；內地A股繼續尋底，上證綜指昨日險守2000點，睇嚟唔頂得幾耐，好快跌到海嘯時候的所謂「鐵底」1950點，內地都借意叫停幾隻新股上市，以防鐵底係漫長跌市下磨穿。港股在A股拉扯之下腳軟軟。
A股唔知跌完未，加上農曆新年將至，市場氣氛將會進一步偏淡，預計港股呢個月都唔會「鹹魚翻生」，不過，恒指在22000點有一定支撐力。恒指昨日跟隨A股靠穩，收市微升43點，收22888點。
地產股又腳軟
中港地產股繼續偏軟。恒生地產分類指數逆市跌0.3%。表現例外嘅係盈大地產(432) 及綠地香港(337) 。市傳盈大地產可能有料到，股價急抽近兩成至3.19元。午後宣佈停牌，話正洽售北京盈科中心。
綠地香港則有花旗唱好。此前市場驚綠地集團A股上市，影響本港上市地位，搞到股價由8月中的9.65元，直插至上日的3.77元，急瀉超過六成。集團主席澄清，A股上市會是集團整體上市，包括金融及能源資產；至於港股上市的綠地香港，會維持作為純地產股，又上調今年銷售目標，由100億人民幣增至120億人民幣。
市場昨日講起電能實業(006) 落實分拆港燈，好多人問買唔買得過。同中環茶友傾起，有茶友話長實集團(001) 主席李嘉誠投資眼光無人會懷疑，佢分拆賣港燈，好可能係睇淡分拆前景，亦可能係套現將資金投資去其他有更高回報地方。有人話歐洲經濟可能見咗底，就算唔係全面復甦，至少都有一啲範疇值得投資，電能套現後就可以趁低吸納，其他人如果覺得分拆對李超人有着數，可以買電能。如果想收息，可以留意港燈認購反應，假如反應一般，上市萬一破底，到時就買到平貨啦！
不過，喺港燈招股前夕，市場就傳出分拆計劃已獲國家電網及阿曼政府之主權財富基金認購，咁搞法自然令隻股多咗概念，家變成唔知有無平貨執。
認購港燈先睇主菜
茶友話，港燈主要業務喺港島區，未來業績有兩個關注點，一係港島區對電力需求增長如何，由於港島已高度發展，唔容易再有大項目；再者就係政府對港燈准許利潤的規管。前者對要睇政府規劃，後者就係政治議題，港燈分拆上市，理論上可以減低政治風險，因為獨立上市後，公司股權多咗股小股東擁有，長和系唔再係加減價的最大受益或受害者。從呢個角度睇，有人會覺得國家電網入股，會有正面影響，甚至會憧憬長和系最後會將港燈賣咗畀中資𠻹。
對於呢啲憧憬，陸羽仁唔敢話無可能，但就唔贊成睇得太重，因為股價波動受好多因素影響，國家電網投資無論背後有無政策性，都係好長好長遠的事，中間可能經歷好多影響股價的中短期消息，故此一般投資者認唔認購，最正路都係睇番業務同上市價吸唔吸引。主權基金認購，可以當係附設的甜點，是否幫襯最緊要都係先考慮主菜好唔好食先。
講開港燈分拆，今個星期另一單同小股東有關的併購，係恒盛(845) 私有化。有茶友牙痛咁聲，話上市時認購咗股份，期內內地、特別係集團投資的上海房價急升，家大股東私有化價錢竟然仲遠低過當年上市價，佢想反對之餘，最唔明係點解作為主要小股東的國壽(2628) ，事前有風聲話會接納收購囉！
陸羽仁
金融High Tea 舊文