金融High Tea 2014年2月24日
WhatsApp交易帶來半盤冷水
2014年02月24日
facebook剛剛買了圖片分享網站Instagram，上周再度出擊，用天價190億美元現金加股票，收購即時通訊應用提供商WhatsApp。交易作價當中用40億美元現金，120億元股票，以及畀WhatsApp的創辦人及員工30億美元的限制性股票。大家都係手機社交網站，WhatsApp現時每月用戶超過4.5億個，當中七成以上是活躍用戶，至少有3億幾戶，Instagram活躍用戶少些，亦有1億戶，但「同人唔同命，同遮唔同柄」，Instagram的收購價只係WhatsApp的十九份之一，只得10億美元，可見網絡世界勝者全取的邏輯。
這次的收購被稱為「世紀交易」，直逼2000年科網狂潮時AOL(美國在線)收購時代華納的壯舉。但論銀碼，這次交易，其實只係「濕濕碎」；AOL當年用了1640億美元巨資收購時代華納。
AOL收購時代華納，組成新公司美國在線時代華納(AOL Time Warner)，當時市場認為這是一個世紀大婚禮，更係「天作之合」。但結合後，隨即迎來互聯網世界的第一個冬天，互聯網泡沫也在2000年爆破。美國在線時代華納屬新舊公司結合的混血兒，慘淡經營十年，終於頂唔住，於2009年5月底，宣佈離婚，及後被市場形容為「企業史上最具災難性的婚姻」。
沒有泡沫 難成交易
今次又見到facebook買WhatsApp的世紀大交易，畀人幾個感覺。第一，最直接的感覺是科網股市場熱度好高。咁呢個市會唔會好似2000年咁，已經去到最高峰呢？據我的觀察，家當然係近高峰啦！唔接近高峰，不會出現這種「世紀交易」，好似WhatsApp這種筍盤，有4.5億客，唔見「天價」，基本上唔會接受收購。既然交易可以天價成交，市場當然相當熾熱，預計「天價交易」將陸續有來，交易價格會愈來愈高、愈離譜。
不過千祈唔好聽到我話科網股好熱，就馬上沽清手上相關股票，否則沽完再升唔好返嚟問我。股市過熱、甚至爆煲前，尾段先至升得最急最精采，「投資的我」唔好掂，但「投機的我」走得早咗又會好肉痛。中短期科網股仲係當炒股。
第二個感覺是facebook不笨。你見facebook出到190億美金咁高價買WhatsApp，以為佢好笨，其實睇番交易細節，facebook認真唔笨。facebook只係付出40億美元現金，其餘的150億美元都係用各種股票代替。WhatsApp無疑係貴，但facebook股票都唔平呀，嚿年年中，股價只係23美元，家已經接近70美元，主要用貴股換貴股啫。facebook是社交媒體一哥，但隨着用家大量從桌面轉移到手機上網，facebook在手機介面唔係咁壟斷性，但一併購WhatsApp這個手機社交巨人之後，即刻補晒自己在手機介面的虛位，以facebook一間市值1750億美元的巨企，用40億現金加唔夠一成股票，換回手機介面上的穩固地位，除笨有精喎。
大股東掂 小股東死
第三，生意得唔等如股票得。我講到facebook呢一着咁掂，咁facebook的股票豈不是好抵買(事實上亦有愈來愈多香港人炒美股)？如果你這樣想的話，又錯誤地將做生意同買股票搞亂了。
正如當年AOL斥巨資1640億美元收購時代華納，也是印公仔紙(發行新股)進行併購，AOL管理層深知自己的股票炒到起泡，借住自己股票價高收購實業公司時代華納，到爆泡後即使AOL的生意變到一錢不值，但還有一舊時代華納「硬崛崛」的生意，AOL無死，你買了佢股票死啫。又好似當日香港的盈科炒到3000億市值，併購了同樣3000億市值的香港電訊，合併成電訊盈科(008) ，當日兩間公司加埋6000億市值，家間電訊得番260億市值，你做佢股東梗係輸死，但盈科由虛擬變成實業，大老闆小超人始終都控制了一間電訊公司，結果又係小股東死、大股東唔死。
微信估值 難超WhatsApp
第四，WhatsApp和facebook聯婚不利騰訊(700) 。WhatsApp以190億美元天價成交，表面上睇應該對在同一個行業、騰訊屬下的微信(WeChat)有刺激作用，點解交易當日騰訊即跌？我估有兩個理由，第一是由夢想變現實。現時炒騰訊主要炒微信的前景，全球手機即時通訊應用的一哥是WhatsApp，排第二是微信，第三的是Line。一直無人認真計過微信值幾錢，但WhatsApp賣了190億美元，排第二的微信無理由貴過WhatsApp，內地有傳媒按WhatsApp交易估計微信值120億美元，即係930億港元，即使估高啲，估微信和WhatsApp一樣值190億美元，也只是1470億港元，但騰訊市值高達1.08萬億港元，若扣除最令人憧憬的微信的價值後，騰訊其他業務值9330億嗎？諗落條數有啲難計，結論係騰訊現價都唔算平咯。
在實際生意層面，facebook收購了WhatsApp，對騰訊的微信也不是好事，現時WhatsApp的客戶十分國際化，每天還以100萬的數字增長，微信卻非常中國化，有估計它七八成用戶來自中國，隨着內地的微信用戶日漸飽和，微信未來要增長本來就要打出去，但WhatsApp和facebook強強聯合後，在產品相互推廣、訊息互通等多個層面都會有協作，微信過去在國際市場打唔贏WhatsApp，將來更難打得贏，所以WhatsApp易手，對騰訊來說雖然壞影響不致太明顯，但卻不是好事。
你睇完我對WhatsApp呢個世紀交易的四個感覺，好似一盤冷水淋落嚟，令你睇清呢啲世紀交易的本質，會變得好冷靜理性，不過太冷靜的人，係唔適合炒股的。網股中長線好大機會爆，但短線唔爆機會大過爆，科網股炒得熾熱，短期內仍會趨上。騰訊(700) 上周五收580.5元，你問我頂部在哪裏，是600元、800元，還是1000元？無人會知。入唔入得？關鍵睇你長揸定短炒啦。
結論係若然短炒，定好止蝕，還可以趁回吐時買吓炒炒，但長揸就咪制啦，長揸窩輪，更是智者不為。好似騰訊呢類股票，過去有一段長時間都係反覆上升，本來短炒佢啲輪，係少數有機會搵到食的窩輪。但你精窩輪發行商都唔呆，邊會畀你咁易食，所以騰訊輪愈發就愈價外，家竟然有明年8月到期的騰訊輪，以1100元行使，都算超級價外輪。輪價咁高，可以行使的機會就比較微啦。1100元的價外騰訊輪，溢價八九成，但係用槓桿夠大、刀仔鋸大樹來吸引股民。若你買入長揸，多數鋸唔到樹，連刀仔都畀人食埋。
最後一升 必更瘋狂
網股也好，賭股也好，升到咁癲，都係阿盲哥先容易贏錢，無乜技巧，總之個膽夠大，一見佢回就買，買咗仲要死揸唔放先至食得多，好似騰訊主席馬化騰自己都在50幾蚊沽咗一大批貨，證明佢都唔夠傻，唔知自己隻股票，沽完仲可以升10倍。
有女性朋友話佢老公買咗騰訊，家未沽，非常開心。買騰訊能揸到今天當然值得恭喜，要騰訊大跌之前，我估仲有一輪暴升，我叫女性朋友幫我留意吓，佢老公哪一個時候開心得不得了，朝早對住鏡都會笑、覺得自己係股神時，記住通知我，到時騰訊先至會爆，未夠癲，就未爆啦。
陸羽仁
金融High Tea 舊文