金融High Tea 2014年3月4日
隔空格劍
2014年03月04日
烏克蘭局勢造成地緣政治不穩，金股匯市場有變化，香港則加多一樣，就係人民幣匯價上星期回軟，估計係同中央係兩會前，驅散投機熱錢有關。今年以來人民幣匯價反覆上揚，喺新興市場貨幣匯價紛紛滑落下，成為跌市奇葩，不過，咁樣帶來兩個負面效果，一個係不少投機熱錢聞到味道，紛紛加入搭順風車，再者喺內地出口商備受壓力。上個星期內地生產物價指數仍然疲軟，就反映咗製造業唔係咁強，呢樣亦同出口數據仍然不俗唔相配，不排除係有資金利用貿易活動遮掩流入內地炒升值。
人仔玩「貶值」出人意表
內地大力打壓人民幣升值投機，對於股市都有間接影響，熱錢湧入唔多唔少要搵嘢炒，或者至少提供了廉價資金畀其他人炒嘢，咁對樓市股市自然有幫助，家內地搞出人民幣匯價下跌，掉轉頭就對投資氣氛有心理影響，所以昨日見到個市愈跌愈多。呢個因素，可能比烏克蘭局勢吃緊，仲來得貼身。
不過，人民幣長年升值，突然玩貶值變咗有啲出人意表。雖然佢出現幾年嚟最明顯的調整，好彩幅度唔大，而且估計中央旨在教訓投機資金，唔會任由人仔不斷滑落，去到咁上下水平，內地管理層又會出嚟維穩，屆時人仔「貶值」的陰影又會淡化，但短期之內，同中資有關，特別係金融類別的股份，波幅都會加劇，而且唔容易有真正升幅。同內地有關的內房股，都借住樓價升勢放緩，出現全線捱沽。中國海外(688) 挫近4%，報20.05元，為表現最差藍籌。
講返國際局勢，烏克蘭驟見戰雲湧至，呢劑嘢好明顯係美國同俄羅斯兩個大佬，喺人哋個場玩嘢，兩個大佬拗手瓜，隔空格劍，隨時格出大頭佛，加上北韓見俄國玩得咁開心，都加入玩導彈，港股昨日借啲意震散，3月份首個交易日急跌超過三百點，恒生指數挨近全日低位收市，10天線及50天線得而復失，僅能險守牛熊線(22467) 上。
港股昨日低開206點，其後A股回穩，一度帶動港股跌幅收窄87點。三時過後，沽壓明顯增大，大市挫逾三百點，最終挨近低位22487收市。恒指收報22500，跌336點；國企指數收報9751，跌139點，成交金額668.4億元。
好似其他地緣危機，烏克蘭或爆發戰爭，資金流入金市避險，金價重返1340美元之上，帶旺金礦股造好。紫金(2899) 升3%，報1.74元；招金(1818) 仲勁抽升7%，報5.48元；中國黃金(2099) 升逾7%。
炒兩會國策如同買大細
喺跌市中另一類表現好過大市的係新能源股，相信係同炒兩會有關。瑞信發報告稱，預料風電行業進入上升周期，刺激風電股表現突出，龍頭龍源(916) 跑贏一眾國指成份股，大升4%收報9.61元，不過仲未創新高；大唐新能源(1798) 揚升5.16%；連帶風電設備股金風科技(2208) 及中國高速傳動(658) 都分別抽高。
兩會有不少民生議題，但結論唔一定對相關股份有利，開大開細好難講，好似澳門博彩業就係敏感題目，而且惹是非機會高，故此雖然澳門政府博彩監察協調局中午公佈，澳門2月份博彩毛收入較上年同期增長40.3%，再創紀錄兼勝於市場預期，賭業股都只係個別發展，反而好似新能源股就係穩陣嘢，就算無大好消息，點都唔會被人照肺搞到股價大跌。
陸羽仁
金融High Tea 舊文