魚樂無窮：炒股心法與麻雀理論 - 唐牛
■股票市場同打麻雀沒有兩樣，都係鬥智鬥力鬥耐性，心理質素差，好容易買乜輸乜。
港股又弱又悶，十足一個垂死病人。好消息搵半個都冇，壞消息就一籮籮︰亞馬遜預警今季業績要見紅，科網股股價直插無水花，令騰訊(700)ADR跌近3%，今日肯定冇運行。五窮六絕又殺到，近年5月例牌弱到冇朋友，2010年起全部報跌，今年隨時過五關。中資股首季業績展開，可惜無論好壞，沽盤都係源源不絕，基金要錢唔要貨格局明顯，後市之差可想而知。
有前輩妙喻，股票市場同打麻雀沒有兩樣，都係鬥智鬥力鬥耐性。麻雀四個人打，你眼望我眼，從眼神、坐姿、語氣出發，不難發現其餘三家嘅牌面同實力。股票市場，講對手，全香港股民不特止，仲有強國人、對沖基金、莊家、金融大鱷，呢班人同場獻技，形勢其實複雜N倍。四方城內，旺家三番牌博人家清一色，唔使出沖之餘仲會自摸；弱家衰起上嚟，十三麼都俾人截糊。股市亦然，市旺時無往而不利，只要肯買就贏，買得大贏得大。一旦情況逆轉，心理質素轉差，好容易買乜輸乜，同現時情況差不多。可以點算？弱家打牌只能死守唔出沖，希望四圈執位再博過。炒股手風唔順，不妨停一停、忍一忍，保留實力方為上策。
金活可趁低撈
金活醫藥(1110)今年初爆升一輪後，跟隨大市回調，近期再展開反彈浪。市場先後傳出復星醫藥(2196)、遠大醫藥(512)等均對金活有興趣。加強，公司亦密謀發展電子商貿，屬有錢途一族，不妨趁近期弱市吼位低吸。
唐牛
上一則: Follow Me：廈門港爆發博升44% - 高彰坡
下一則: 股場放大鏡：輝山股東掟貨有玄機 - 歐陽風
魚樂無窮 - 唐牛 舊文