金融High Tea 2014年5月8日
冷縮熱脹
2014年05月08日
港股假後開市唔係咁靚仔，網股幅度尤其慘烈。網股跌得咁甘，有幾個理由，最基本好似我講，中港科網股係跟美國走，華爾街大鱷近日狂插呢類股份，死因係twitter有員工股份可以解凍買賣，即係市場多咗好多貨源供應，基金借住話公司業績唔符預期，大力係咁沽貨，隻twitter上日大跌18%，搞到美國科網股風聲鶴唳。
冷風由美國吹到，令到騰訊(700) 為首的網股跌個不停，中環茶友問，早排投資銀行係咁發騰訊輪等衍生工具，?家會唔會因為做咗對沖有拆倉壓力呢？茶友都話呢個問題其實唔可以忽視。理論上發行商發認購輪，要買一定數量現貨做動態對沖，睇住個勢做，隻股升佢都要增持做多啲對沖，但如今正股不斷跌，佢哋就可以減持，甚至大量回購自己發的窩輪拆埋倉，所以跌起上來會幾何級數咁增加沽壓。加上騰訊係超級大價股，散戶老早已經無貨，貨源落晒大戶手裏，有啲人用佢舞高弄低指數，有啲人用佢炒作衍生工具搵食，唔殺晒散戶唔停手也。
升也騰訊跌也騰訊
第一季騰訊股價交投咁大，但相關場內場外衍生工具的數字仲得人驚，所以外界見到佢隻股有咁多交投，就好似只睇到埋係沙堆裏面的金字塔頂，當你扒開啲沙，先發覺原來個塔有絕大部份根本未暴露出來。既然衍生工具數字咁驚人，就算只係有部份要拆倉，沽貨數字都唔可以睇少，總之當日騰訊可以因為衍生工具作怪升到你唔信，今日一樣可以變成弱不禁風，一隊就插。
由於騰訊加埋隻友邦(1299) 做咗跌市火車頭，合共拖低恒指93點，搞到指數最多挫296點，低見21680點。大市反彈動力弱，尾市勉強重返21700點上收市。恒生指數收報21746點，跌230點；國企指數收報9655點，跌87點，成交金額增至623億元。國企指數跌幅少過恒指，顯示有資金開始在低位累積國企。
騰訊帶住科網股尋底，佢死敵阿里巴巴正式遞交赴美國上市申請，一眾阿里概念股表現只係好壞參半。炒得最厲害的中信21世紀(241) 勁升20.73%報6.29元；海爾電器(1169) 降1.57%報18.82元。另一方面，納指急跌，其他在香港上市的中國科網股亦未能受惠行業龍頭在美上市的消息，普遍沽壓沉重。
今年「五一」真係無乜好消息，香港零售「立立哋」，內地一樣話「五一」賣樓唔係好得，搞到內房股紛紛降價售樓。中國海外(688) 跌4.5%報17.74元；華潤置地(1109) 挫4.7%報14.86元，潤地及中海外更是表現最差的藍籌首兩位。
五一失色內房腳軟
如果有留意內地傳媒近日已經不斷傳出二、三線城市去貨慢的消息，仲紛紛傳出不同地方政府想鬆綁限購令的傳言。最新數字係4月份全國54個城市新房銷售面積，按月下跌5.6%；今年首四個月，新房總銷售量比去年同期下跌25%。內地傳媒話樓市「呆滯」無乜錯，但報道話地方政府鬆綁，就一直無證實，至今為止都係只聞樓梯響，暫時無料到。
內地賣樓減價有好多原因，其一係好多買家同香港人一樣，係樓價愈貴愈要買，樓價變平反而無人吼，內地樓市而家有限購令，即係話乜外地人可以炒，無人炒靠用家買，用家市場冷縮熱脹特別明顯。?家樓價放緩，房哥房姐唔單止唔買，有人仲走去放樓！外資同熱錢見到咁形勢，有人走去賣樓，無樓賣的大戶，就沽咗內房股先，咁搞法你話股價點會唔跌呢？不過你知我係逆反派，見到中國海外插得咁深，又唔覺得要低沽喎。反而想等佢再狠插一回，低價買啲貨。
陸羽仁
金融High Tea 舊文