Prof J財技特訓班：炒股要有耐性 - 徐燦傑
■筆者認為，買股票最緊要識喺股海暢泳，把握時機，隨時出擊。資料圖片
股市上上落落，乜股都傷，似足梅姐所講，「一切已失去」！美股去到「天空之城」格局，落又落唔到幾多！中國經濟又話增速放緩，真係佩服做即市嗰班老友記喺市場混沌期搵嘢講，真係唔容易！
三年前向幕前出擊，都係嗰句，「隨時出擊」！我嘅新口號。Prof J相信，資本市場嘅黃金時代正式開始，因為大家識嘢多咗，你嘅對手自然對你嘅行為更加了解，真係同媾女無分別！好多時候，好多我嘅老友都問我有冇「必勝冧巴」，我例唔答，原因係每個人嘅風險接受水平唔同；其次，原來觀察一隻股真係要好似蜘蛛俠睇住Gwen Stacy一樣，越低調越安全！(雖然最後都死咗，但係呢種心理行為學令我更加擺時間研究！)有一隻股先叫佢做X，係一位手足同Prof J分享，佢為人低調，佢同我講X股三部曲(我心諗咁似蜘蛛俠嘅)，講到真嘅一樣，睇個圖，股價無厘頭升上去，真嘅一樣，叫到買少少啦！(而家明白周大師點解咁多老友，全部都係真金白銀去結交)。佢買入價比我平0.15大洋，我買嘅時候比去到最高位升咗三成八，無走，例牌，回調、橫行、大跌，但「價跌量不增」成為我第一個關口，跟住由我買入位最多跌了45%，仲唔驚，我又同自己講，明明X股三部曲已經出嚟，跟住去到呢啲位唔打靶，無理由！之後隻股喺幾日後去返Prof J買入價！以上真實案例，Prof J想總結以下幾個點子：
成交量最可信
(一)炒股要有耐性，只要隻股基調不變，你嘅自我欺騙能力好緊要！
(二)你嘅對手，比我哋掌握嘅嘢多，成交量係我永遠最信任嘅指標！因為佢哋嘅子彈，係非常之有限，要「讓子彈飛」都要肯定無乜人喺條街，得咁多子彈先有chance！
(三)你嘅對手唔係想你死，有你喺度個遊戲先好玩！最緊要，係自己要識得何CC嘅韻律泳！保證你能夠股海暢泳，一齊隨時出擊！
徐燦傑
中國銀河國際財富管理主管
本欄逢周四刊出
上一則: 青心直說：救內房靠QE - 胡孟青
下一則: 焯焯有餘 ：高檔零售寒冬 - 關焯照
Prof J財技特訓班 - 徐燦傑 舊文