魚樂無窮：發掘靚殼孖寶迎熱潮
■永利地產大股東周德雄(中)及關連人士持有公司股份達七成，賣盤容易，隨時變潛力殼股。資料圖片
德國狂數巴西七個一皮，成為全宇宙茶餘飯後嘅話題。唔少人歸咎喺尼馬、堤亞高施華缺陣下，教練大菲戰術超錯。馬後炮以波論波，其實喺德國打開缺口前，巴西採取緊逼踢法，用體力彌補球員質素不足，絕對正確。可惜德國藉角球開紀錄後，森巴兵團隨即陣腳大亂，最終演變成國殤日。從投資角度看，大菲就如大跌市買貼價牛證博反彈，希望可以逆市突圍。炒股睇錯邊可以立即轉身，可惜輸波就要再等四年先可以報仇。
殼股炒風越吹越烈，獲內房股中國綠景垂青嘅新澤(095)炒高11%，大股東有意賣盤嘅俊和(711)再升半成，既然有真金白銀搶貨，就無謂拗頸，今日再推介兩隻潛在殼股畀大家參考。
永利地產細粒兼優質
第一隻係由永利控股(876)分拆出來嘅永利地產(864)，前者4月已宣佈控股權易手，後者其實亦有賣殼條件──大股東周德雄及關連人士持股達七成，最新市值3億銀唔夠，要轉手話都冇咁易。永利地產喺中港擁有超過30項投資物業，折合每股NAV達2.38元，現價PB僅0.3倍，質地一流，如果踏上賣盤之路，釋放價值動力打孖上。
第二隻係雅天妮(789)，公司連續六年蝕錢，加上創辦人謝超群及葉英琴相繼淡出，點睇都唔似有翻身機會，賣殼應為最佳出路，公司最新市值2.7億銀，又係細細粒容易食，公司主打時尚配飾，業務架構簡單，大有機會成為洽購對象。
唐牛
https://www.facebook.com/tongcow88
唐牛
魚樂無窮 - 唐牛 舊文