Prof J財技特訓班：新城逆市發圍
■新城在中國房地產市場處於低迷時，仍高企龍頭位置。
作為一個媒體朋友，同上市公司溝通嘅主要渠道，無可否認一定係公關公司。皆因上市公司會透過公關公司舉辦好多唔同類型嘅活動項目，例如飯局、gathering(千祈唔好誤會！其實即係公司探訪，順道可以見識當地嘅靚景同美食等等)。
關於呢類活動，Prof J好多時都去唔切，要同領匯(823)嘅姐姐仔道歉，請親我去，我都係去唔到，下次一定要同佢食餐飯，送本新書畀佢！唯有叫兄弟頂住個活動，大家都知道，要去呢啲活動，食，自然係無可避免的，但我又怕下午會食得太飽，講真係驚食肥，哈！最喜歡係莫過於叫公關公司安排個一對一嘅面談，因為問嘅嘢直接啲，又可以有針對性啲！
始終越深入嘅了解，對公司喺蜻蜓投資法呢個角度方面，係非常有用的！
上周五，出席咗一間公關公司安排嘅再創高峯活動，話曬都係支持嘅機構，成日企喺度就唔在講，見到超過二十多間來自中、港、台嘅上市公司，當然唔會放過學嘢嘅機會！
新股IPO繼續瘋狂造好，首日表現無跡可尋，但第一日收市後，表現斷定咗佢嘅短途走勢同節奏！波就快踢完，係時侯除咗件球衣，著番件股神戰衣，一齊出擊炒番轉。
龍頭地位策略得宜
Prof J留意到隻新城控股(1030)，雖然中國房地產嘅需求明顯有放緩感覺，但由於新城嘅亮點係奉行高周轉、區域深耕等攻略，2013年度新城喺總費周轉率、收益率都高企，令新城喺市場低迷時，仍處於龍頭大佬地位。
睇嚇銷售層面，新城喺上海、常州、蘇州和南京發展越嚟越成熟，上年合約銷售金額按年增長73.41%咁多，成績喺同業中數一數二。睇數據同手頭資料，新城股價仍然偏低，如果股價喺0.7元附近有支持，跌佢唔落，公司股價再加上基本層面帶動下，又係一隻可造嘅小蜻蜓，大家繼續追蹤出發！
徐燦傑
齊魯國際控股首席策略總監
本欄逢周四刊出
徐燦傑
Prof J財技特訓班 - 徐燦傑 舊文