中環在線：月中舉行新書簽名會
任總吸400粉絲
■任志剛雖然退咗休五年，但市民都無遺忘佢。
世界盃將於本月14日煞科，本港另一項盛事又殺到，咪就係書展囉。唔講唔知，香港書展已經去到第25屆，本月16至22日舉行，今年有一個環節吸引到好多中環人關注，事關金管局前總裁任志剛較早前推出新書《居安思危》，將於本月20日舉行簽名分享會，參與人數上限約500人，至今已經有400人登記，可見任總魅力依然。
任總雖然退休五年，但市民並未遺忘，佢為官生涯40載，承載嘅記憶就係一幕幕本地金融發展史，最近呢位金融沙皇，將百篇《觀點》舊作收錄，以其金句《居安思危》出書。佢呢本書第一版已經差唔多售罄，準備加印第二同埋第三版。
陶冬張化橋都有新作
配合書展活動，佢將於本月20號下晝喺灣仔會展舉行簽名分享會，重量級人馬暢談金融，粉絲自然捧場，聽聞已有400人登記入場。
近年與沙皇有影皆雙嘅任太葉小慧，當日會到場支持，歷時兩粒鐘嘅座談會，任總仲會跟一班大學生喺台上分享對談，講金融，講世態。
回首幕幕金融風波，莫過於留下圖片立此存照，協助新書出版嘅《信報》，趁勢舉辦「光影．金融」攝影比賽，讓公眾分享珍貴收藏，參加者可提交最多10張(未經電腦合成)嘅未經曝光照片，獵取主題環繞金融生態。
四個得獎作品中，三個會以「公投」形式(公眾投票最多like圖片)產生，另一個名為「任總至like圖片」，就由任總「欽點」。
除咗任總，幾位財經界名人都趁書展檔期出書，包括基金經理林少陽嘅《催化劑投資法》、瑞信亞洲區首席經濟師陶冬嘅《經勢轉捩點》，仲有「民企之父」張化橋嘅《Party Man, Company Man: Is China"s State Capitalism Doomed?》。
李華華
mailto:LiWaWa@AppleDaily.com
【學界佔中黃竹坑現場】YouTube重溫：
http://bit.ly/71march
LiWaWa@AppleDaily.com
中環在線 - 李華華 舊文