金融High Tea 2014年7月7日
息魔陰影 炒作留神
2014年07月07日
上星期四，美國國慶假期前夕，美國公佈6月非農業就業報告，職位增長28.8萬個，遠遠高於市場平均預期的增加21萬，失業率跌到6.1%，顯示經濟正穩步復甦。消息公佈以後，刺激美股向上，杜指首次企上17000點大關樓上，收17068點，美股一片繁榮景象。
港股在上周五表現卻麻麻哋，恒指只係微升14點，唔上唔落。點解美股創新高，港股無表現呢？我同中環茶友食飯吹水，講起市場上已有一些長線投資者，特別是一些大戶基金，開始憂慮息魔遲早降臨，所以不積極買貨。
事實上，美國公佈非農就業數據後，摩根大通隨即將聯儲局加息的預期時間，由2015年第四季度提前一季至第三季度。主要考慮係美國經濟強勁增長，聯儲局已經好有條件加息。假如往後幾個月，例如7、8、9月，美國就業數據仍然咁強勁，聯儲局將會放出更加明顯的加息提示，要大家有明年初將會加息的心理準備。
加息提前 收息股差
在美國市況繁榮底下，潛伏着提早加息的隱憂。美國股市目前的狀況喺經濟好呢個好消息下，混合着加息呢個壞消息。美國復甦美企利潤好，加息和經濟改善的衝擊互相抵銷，股市反應暫時不大。但香港及內地經濟表現麻麻，不如美國，加息對股市及樓市的衝擊會相對地大。
有中環茶友話，看看上周五港股個別板塊的升跌表現，大體上已經有個譜，反映了投資者喜歡甚麼，以及擔心些甚麼。升得比較好的是之前跌得較多的內房股，主要與個別內房企的賣樓成績OK有關。另一個表現不錯的行業係內銀股，例如工行(1398) 與建行(939) 都升約0.5%，它們是內地樓市回穩的間接受惠者。比較差的是一些對息口比較敏感的本地股份，例如房託股領匯(823) ，逆市跌1.3%，買佢主要收息的公用股如中電(002) 跌0.5%；地產股亦唔好，長實(001) 跌0.8%，新地(016) 跌0.5%。
美國10年期債息在5月28日低見2.44厘，應在呢個位尋到底，家已經開始慢慢一級級咁上，照計美國就業咁好，未來美息都好難再落，未來又係一個反覆向3.04厘高位上望的旅程。美國利息向上，資金回流美債，就會沽售收息股。
瑞銀調低 恒指目標
面對加息陰影，多家大行對港股後市表現較前謹慎，例如摩根士丹利上月將恒指目標由原來的25600點，下調至25000點，H股目標由12200點降至11800點，降幅仍未算好大，主要的考慮係認為內地經濟唔得，將拖累港股。大摩預計今年內地經濟增長會減慢至7%，明年為7.2%，低過阿爺今年的目標7.5%。
最新加入降級軍團的，是以歐資客戶為主的瑞銀，佢亦睇唔好港股後市。該行分析員梁裕昌認為，聯儲局最快會於明年中加息，預計明年底將加到1.25厘，勢將衝擊本港樓市股市。梁裕昌調低恒指年底指數目標7.3%，將目標由25767點，降至23899點，相等於預測市盈率10.1倍，港股在亞洲市場投資評級亦由「中性」降至「輕倉」。瑞銀的目標指數比恒指上周五收報的23546點，只係高222點。
瑞銀對本港住宅樓市睇法亦悲觀，佢哋假設按揭利率提高2至3厘至5至6厘，按揭負擔將升至超過GDP的6%。加上樓宇供應過多，買家承受能力又較弱，要密切留意加息的負面影響。瑞銀預計樓價會按年跌10至15%，若明年美國聯儲局真係加息至1.25厘，將再下跌10至15%，梁裕昌建議投資者應趁現時樓市小陽春，在高位沽貨。
歐洲量寬 唔玩港股
瑞銀梁裕昌似乎轉咗軚，上月佢睇港股時沒有明顯方向，仲認為「滬港通」及內地經濟改革將帶動港股走勢，但一個月後轉淡了。
有茶友話，瑞銀的強項是歐資客，歐洲投資者睇淡港股，其實頗正常，因為歐羅區正在爭論緊應唔應該量寬，睇見美國推出量寬之後咁好景，唔排除歐洲領導人好想步老美後塵，玩玩量寬，歐股看好。至於美國，因應經濟好而加息，股市應該仲頂得吓。香港經濟普通，但逼住要跟美國一齊加息。所以歐洲投資者，睇好歐股，對美股中性，對港股睇淡，實屬正常。
港股近排反彈上高位，但幅度同升勢都追唔到美股，並非大力向上破高的格局，只是跟升。現時所處的高位，與去年12月的高位24111點，仍有一段距離，未能好爽快地升上新高。除了被內地經濟拖住後腿以外，主要還是憂慮加息對股市的打擊。估計港股1年中線走勢，好大程度會與利息的走勢相關。早前半年結的時候，金管局要入市壓住港元升勢，不過近日未見金管局有任何行動，未見流入資金有強勁後續力。
茶友話以極短期而言，港股還是跟美股，美股繼續上試高位，港股未係太怕息魔住，不過炒作要留神，繼續避開息口敏感股好啲。
內房賣樓 萬科跑出
另一方面，講講內房股。內地房企上半年的賣樓成績未完全公佈，易居等民間調查搶先出籠(見表)。萬科企業(2202) 排頭位，半年銷售1009億元人仔，較去年升21%；排第二及第三位係恒大(3333) 及碧桂園(2007) ，首次超過中海外(688) 。恒大及碧桂園上半年的按年增長幅度其實都好厲害，恒大升60%，碧桂園升75%。
值得提一提萬科，我之前都提過，萬科一來香港上市，中海外便會失色好多。萬科表現非常強勁，6月份銷售回升，銷售194億元，按年增長44%，今年全年賣樓目標2000億元，目前已經完成超過一半，符合每月進度。我之前提過萬科係勁股，唔好忽略佢，真係好快就跑出，上星期五勁升8.2%至15.8元，升幅係內房之冠。
內房股的升幅與賣樓增長有好大的相關性。恒大同碧桂園賣樓成績好過中海外，後者銷售同期萎縮10%。所以股價表現亦明顯比中海外好，恆大升2.2%至3.2元；碧桂園漲5.8%至3.48元。中海外賣樓成績麻麻，升幅只1.9%，收20.3元。上半年中海外的銷售額與碧桂園相差唔係好多，但銷情呆滯，未來對股價有負面影響。要留意碧桂園等只是低價傾銷，中海外唔肯減咁多所以賣少咗，其實大家都係面對緊較差的市道，所以碧桂園促銷亦會影響毛利率。
至於銷售比較弱的房企，龍湖地產(960) 上半年銷售只有202億元，比去年同期收縮10%，股價表現相對差好多，人升佢唔升，逆市跌0.2%至10.1元。大家都知內地樓市呆滯，內房股表現差，一點不強勁，不過隨着中央放鬆部份地區的限購令，那些能夠保持相當銷量的房企，又可以有較好反彈。特別係萬科呢隻龍頭股，高追唔好搞，但等佢回吐時，可以逢低吸納。
陸羽仁
金融High Tea 舊文