金融High Tea 2014年9月10日
大龍鳳出台
2014年09月10日
9月份幾場大龍鳳陸續上演，蘋果推出新手機在即，相關概念股先後炒起。已聞樓梯響多時的阿里巴巴上市，已經安排路演。千呼萬喚戲碼上場，對個市係好事抑或係壞事仲未知，港股就在假期前唞氣，好友淡友似乎留待假後才再決戰。內地中秋係放正日，昨日內地有半日市，但假期氣氛好濃，大家賞完月仲未急於搏殺，上證綜指收報2326點，微升0.1點。
包銷要拓阿里概念股
外圍幾場重頭戲上演，地點都係美國。咁啱美資大行摩根士丹利就發表最新亞洲策略報告，預測恒生指數及國企指數基本目標，分別為27600點及13100點，較早前的預測上調3%至5%，潛在升幅約10%至15%，最吸睛嘅係話未來12個月最牛目標，分別為33000點及16000點，較現水平約有30%至40%潛在升幅。呢次係摩笛近期第二次唱好港股，反而引起市場人士戒心，話大行喺重大利好消息出台前撥到個市咁熱，唔知係咪別有所圖。
報告仲話，在亞洲新興市場領域之中，國指係其中一個具有最大潛在升幅的市場，而焦點股分別有炒蘋果概念嘅瑞聲科技(2018) 、中移動(941) ，同埋炒阿里上市嘅騰訊(700) 。
大行炒作兩場大龍鳳概念，但喺蘋果舉行發佈會前，三大中資營運商有望發售新iPhone，中移動收101.3元，升1.1元；中電信(728) 收5.17元，上揚0.14元。蘋果概念股普遍升，舜宇光學科技(2382) 報10.92元，上揚0.22元；瑞聲科技造50元，上揚0.3元，不過好多人家都係等緊新手機出場傳捷報，然後就沽貨食胡嘞。
至於阿里巴巴啟動美國上市，集資最多243億美元，招股價定為每股60至66美元，定價略低過預期，據講路演初期反應理想。雖然有人解畫，此舉係預留上升空間，但就拖累本港上市的科網股在假前受壓。騰訊造126.1元，跌2.2元，跌幅為藍籌第二大。之後美股開市，石油股下挫拖低咗個市，但因為阿里上市紙上財富大增嘅雅虎就力撐大市，美國杜指收市微跌25點。阿里上市有超過一半係賣舊股，好多猛人都有份分一杯羹，好似李嘉誠基金會都有股份，以上市價計賺得相當和味。另外與前領導人江澤民家族有關的博裕資本和國開行都係呢次套現大計的得益者。市場估計喺阿里上市前，包銷商點都會力挺雅虎同埋騰訊呢啲相同板塊嘅大隻佬。
有說法話阿里上市法律費用遠高過其他科網股，反映佢日後可能受到訴訟威脅比較大，故此股價要有折讓，先至能吸引到投資者圍飛，總之唔理乜理由，阿里係美國歷來最大抽水計劃，一節難免淡三墟，唔多唔少令人擔心高潮過後，剩低只有空虛，故此跟風炒作者都唔敢去得太盡！
假前恒基李四叔有動作，沉寂多年的恒基發展(097) 突然宣佈以現金9.345億元，向控股公司恒地(012) 購入全線千色店業務，並承諾往後三年每年派至少4仙股息，由於注資之餘仲承諾未來會有唔錯嘅股息派，刺激小恒基飆咗21%，報0.82元；至於恒地亦漲2.1%，報56元，為第二大升幅藍籌。
李四叔變活躍份子
小恒基曾經是系內控股公司，自從多年前出售名下煤氣等貴重資產畀母公司，就變成不活躍嘅一員，市場經常揣測佢有動作，一係就賣畀人；一係就搞注資，等咗咁耐終到有眉目，由於今次係由集團內注入資產，惹起市場分產嘅揣測，若然分析無錯，以李四叔家族咁多資產，注資隨時有排玩。
李四叔早幾年不時出來品評股市，有時仲派吓貼士，好多小股民封佢做偶像，有口痕友捧為亞洲股神，金融海嘯後佢減少咗現身。近排不斷增持恒地，用行動話畀股民知佢搞緊乜，結果惹起市場追捧，好多大行出報告。小恒基今次注入千色店，講資產質素同收購價錢都唔算特別吸引，對股民來說最大賣點反而係咁多年無乜炒過，貨源相信高度歸邊，如果小股東已經等咗咁耐，就不妨畀啲耐性睇大股東點表演！
大市有番啲熱度，新股跟住開車，做建築的「蚊型股」創業集團(2221) 籌資唔夠1億元，結果爆額288倍，隨時打入十大超購王，呢類超微型股仔上市會短期炒吓唔奇，但長揸就唔太建議，最好係有胡就食，好過夜長夢多。另外，內地最大租賃汽車公司神州租車(699) 首日招股，由於同類公司唔係咁多，據講國際配售反應唔差。
陸羽仁
金融High Tea 舊文