陸羽仁 BLOG 2014年10月21日
貼錢賣仔
2014/10/21 上午 08:44:26
網誌分類: 經濟
昨日左右美股走勢的主要係美企業績。阿爺召開四中全會，亞洲投資者憧憬中國有刺激經濟措施出台，加上上周五美股造好，亞洲股市幾近全線上揚。日本股市升1.9%，韓國漲1.6%，內地A股升0.7%，恆指比較弱雞，微升47點或0.2%。
但去到歐洲唔係幾得。有消息指歐洲央行已啟動資産購買計劃，首先買入法國擔保債券。不過，可能係上周五升得太勁，歐股昨日不升反跌1.2%，其中德國跌1.5%，法國跌1.1%。
歐股唔掂，打擊美國市場氣氛，加上IBM第三季業績唔得，而且公布預計2015年將無法達成預期利潤，股價暴跌8.4%！拖累拖杜指開市即插120點。有賴其他美企，尤其係蘋果公司派出靚仔財務報告，撐住大市，美股跌幅得以逐步收窄，杜指收復所有失地，由跌轉升，收市倒升19點至16400點。得蘋果公司股價大升2.1%幫助，標普500指數收市升17點至1904點，納指更大升58點至4316點，升幅1.4%。蘋果在標普500指數升幅榜排第二，在納指升幅榜排第一。
IBM公布第3季財報，認真唔掂，持續經營業務經調整後每股盈利3.68美元，少過去年同期9.8%，計入停業部門損失後每股盈利只有2美分。營收亦減少4%至224億美元，已經連續十季下跌。IBM執行長羅梅娣在聲明中話，客戶購買情況在9月顯著下降，特別係硬體部門和新興市場表現最差，估計係客戶逐漸將資料和軟體轉存至雲端運算網路，對伺服器和大型主機需求續漸減少，影響公司整體表現。呢個係市場結構性轉變，所以IBM表示，預計2015年將無法達成預期的目標利潤。
與此同時，IBM宣布倒貼15億美元，把半導體製造部門送俾格羅方德公司(Globalfoundries)，半導體製造事業佔IBM整體營收雖然唔夠2%，但部門去年虧損7億美元，今年上半年已經虧損4億美元，有資料顯示最多曾經試過一年蝕15億美元，所以決定壯士斷腕。IBM為了脫手半導體部門，已經在第三季財報中撥備47億美元作為虧損費用。格羅方德攞到IBM紐約及佛蒙特州的製造設施，並且留住原有員工。貼錢送出部門，因為自己搞掂要俾員工遣散費加一大堆善後工作，成本可能更高。貼錢送走公司，都可以話係併購新典範。
IBM股價大跌，股神巴菲特嘅巴郡(Berkshire Hathaway)亦都中招。原來股神手上有7000萬股IBM，昨日股價跌12.95美元，唔見咗9億美元。巴菲特月初時至承認過買錯咗英國零售企業特易購(TESCO)股票，令到巴郡損失7.5億美元，估唔到買IBM仲大劑，蝕得仲勁。不過，正如股神經常講嘅，要到潮水退咗之後，先至見到邊個條泳褲被水沖走，今次到佢無著褲。
蘋果公司昨日收市後公布業績，第四財季營收為421.23億美元，高過去年同期12%；凈利潤為84.67億美元，亦有13%增長。盈利同營收都高過市場預期。蘋果公司股價昨日漲2.1%至99,76美元，公布業績後再升1.5%至101.25美元，重上100美元大關。
美股走勢本來有利本地的科技股、手機股，但本地市場仍弱，小心炒作短癮。
陸羽仁
回應(1) 我想回應
陸羽仁 BLOG 舊文