金融High Tea 2014年10月21日
寧炒四中
2014年10月21日
美股上周五勁彈，港股預咗有得升番啲，但結果高開之後無乜力，似乎好多人學咗陸羽仁咁諗，認為反彈係沽貨而唔係追入嘅好時機，再加上滬港通未通，個市結果升得47點收市，港交所(388) 仲人升佢跌，全日收報172.3元，跌0.81%。
政治市底氣弱
上星期好多人吹滬港通有消息，陸羽仁覺得一廂情願嘅感覺好濃。無錯，家好多股票佬，包括兩間交易所高層好心急等開通，好似《證券時報》就引述消息報道，上周六進行的滬港通新中央結算系統程式遷移測試，順利進行，呢啲都係技術層面嘅嘢，講到底政策係點，就要睇阿爺，仲要唔係睇李克強總理，而係習近平總書記，都話習近平每日都睇香港佔中匯報咯，無得唔理佔領行動，唔通你一面搞，阿爺仲一面宣佈好消息益你，無理由咁順攤到咁嘅田地？
據內地媒體報道，內地多間證券商在技術測試中，順利把系統切入到正式的交易環境，昨日起至本周六設定為系統穩定期。咁已經說明咗，由於配套基本上搞掂，滬港通幾時有得炒，已經變成主要睇政治因素而決定。若清晒場好似無事發生一樣，滬港通可能可以通，但睇個樣唔似喺短期內清到場，就唯有測試、測試再測試啦。
本地市底弱，外圍絕地反彈，港股跟隨高開逾267點，後來缺乏利好消息支持，升幅大幅收窄，全日波幅只有238點，最終收升47點，報23070點，主板成交只有530億元，為三個月最少單日成交。人行放出2000億元人仔進入銀行體系，上證綜指收升0.7%，報2356點，國指只升61點，升幅0.6%，收報10295點。
天津市國土房管局等六部門聯合發文，全面放開限購，同時放鬆首套自住房貸款。中海外(688) 收升1.7%，報21.4元，為表現最好藍籌；潤地(1109) 收升0.7%，報17.86元；民企內房世房(813) 最終升1.3%；雅居樂(3383) 全日收報3.82元，升0.5%。
棄軍工炒鐵路光伏
港股焦點除了佔中和滬港通，另一個焦點就是內地舉行的中共四中全會。今屆四中全會，政治上的焦點是以法治國，將打貪制度化，而經濟上就是如何維持增長。近日，總理李克強出訪歐洲，以及領導人提出和東南亞合作，都反映了內地的經濟策略。
為了升級轉型，內地正準備推動絲路經濟，加強內地和歐亞地區的合作。古代的絲路由亞洲到達歐洲，創造了巨大的經濟效應，北京現在推動的新思路，就是加強與俄羅斯、東歐的合作，其中包括像高鐵的項目。早前幾隻高鐵股包括南車(1766) 、北車(6199) 反覆炒高，就有點偷步炒四中全會的味道。
昨日，國資委在微博公佈，北車聯同BBC聯合體，與泰國國家鐵路公司，簽署了115輛米軌鐵路客車項目合同，但未有透露合同涉及的金額。與北車合作發展鐵路客車項目的BBC聯合體，是由中鐵建(1186) 、一間當地公司和聯合礦業公司所組成。這是泰國國家鐵路公司有史以來，簽署的最大額鐵路客車採購合同。
四中全會概念當炒，光伏股接力普遍造好，而軍工股則繼續回吐。協鑫新能源(451) 大升18％，最終報3.93元；保利協鑫(3800) 升2.4％，收報2.61元；興業太陽能(750) 升1.8％，報14.56元。
反之軍工股沽壓強勁，航天控股(031) 跌4.72%，收報1.01元；中航國際(161) 及中國航空工業(232) 均大插，分別跌16.4%及12.8%。大家要明白，大市唔係咁好，炒作都幾短癮，借住消息不斷地轉換板塊炒作。
陸羽仁
金融High Tea 舊文