金融High Tea 2014年10月20日
滬港通倒轉炒
2014年10月20日
上星期五內地股市跌0.7%，港股則反彈0.6%，主要係受到上周四歐美股市反彈所帶動。到晚上即上周五歐美股市走勢仲凌厲，歐洲股市受到美國聯儲局高官認為應該推遲結束QE的「鴿派」言論刺激，大漲2.8%，其中德國股市飆升3.1%，法國亦漲2.9%。
歐股造好，美股唔會衰。加上美國最新出爐嘅房屋市場數據不俗，9月份新屋開建數字增長6.3%，年化數字攀升至102萬幢，符合市場預期，好過上月的95.7萬幢；10月密歇根大學消費者信心指數初值為86.4，也高過預期的84.1。美股造好，杜指大升263點，升幅1.6%。
美國港股預託證券(ADR)港股指數收市較香港上周五收市升128點或者0.6%，睇嚟港股今日仍會跟住外圍繼續反彈。
美股大升 港股可彈
我話港股反彈，而未係轉勢，原因係港股基調仍然唔係幾好。內地四中全會今日開始，周四完結。今次的會議主題聞說係打大老虎周永康(唔係學聯的老虎仔)，將反貪制度化，以及繼續深化經濟改革。阿爺要搞好經濟改革，不是可以一時三刻見效的事，所以對港股只屬溫和利好消息，唔係具體嘅利好消息，對利好大市有限，關鍵仍然係睇佔中的發展，以及望到頸都長嘅滬港通可否開通。
港交所(388) 行政總裁李小加向來都係滬港通大好友，在陸羽仁話滬港通好大機會唔得嘅時候，李小加仲不斷放出好多關於滬港通還會如期啟動的訊息。我覺得李小加只係唔想放棄而已，而投資者卻信以為真，經常因為炒滬港通照開車令大市反彈。
滬港不通 拖着不說
有關方面一路都話，中證監會於滬港通啟動前兩個星期公佈有關詳情，但一個星期又一個星期過去，都無公佈，到上周五已經係今個月能夠啟動的死線，李小加終於轉變口風，話目前相關事項各方已準備就緒，但就尚未有開通的時間表，又話不一定要在開通前一個或兩個星期公佈，叫大家唔好在時間上過份解讀。聽佢嘅口氣，似乎都唔知幾時會公佈，甚至會唔會公佈都無講。上周五中證監開會之後，仍然對滬港通粒聲無出，睇嚟十月通唔到，已成定局。
估計滬港通延期開通的主要原因係受佔領運動嘅影響，佔領運動已經熬咗三個星期，如果能夠快速解決，滬港通仍然有希望如期在今個月落實。但睇佔領運動現時的狀況，估計短期內解決不了。
阿爺的態度係讓特區政府自行慢慢解決問題，而特區政府想用逐步清場的招數，想一步步、一區區清理被佔據的路面。但行動唔係幾順利，例如旺角，上星期五清晨，政府拆完阻街的障礙物，清了部份馬路通番車，但到晚上好快又再被佔據，仲要打大交收場。政府要在短期內解決問題，談何容易？在這種政治不穩的環境下，阿爺唔會放心畀好嘢益香港。
我估中央不會正式宣佈暫停滬港通，但會拖着不說，陷入一個「你懂的」之狀態中，這樣股市未至於急插，但會陷入低氣壓中。市場慢慢發現滬港通推出時間遙遙無期，除了大巿受壓之外，此前炒得火熱的滬港通概念股，會出現比較深度的調整，而不會只係跌少少就企得穩。因此，我認為滬港通概念股應該倒轉炒，捕捉向下炒的機會，逢反彈分段減持或造淡。
相關概念 還可深跌
睇番炒作滬港通的起點，是總理李克強今年4月在博鰲論壇上提出滬港股市可以互通，資金可以南下北上買股。相關的概念股，尤其係內地證券商股隨即炒到飛起，消息落實後三、四個月，中信證券(6030) 炒高33%至20.25元；國泰君安國際(1788) 炒高58%至6.12元；申銀萬國(218) 炒高51%至5.72元；第一上海(227) 仲誇張，飆升1.5倍至1.97元。隨着滬港通遲遲未開到鑼，上述的股票亦回番少少，中信證券及國泰君安國際比高位回落10%及12%；申銀萬國及第一上海分別回落21%及22%。我覺得這些股票仍未跌夠，起碼要由高位回落三分一至50%就差唔多，所以仍有唔細的下跌空間。
滬港通推出無期，市場慢慢會加深悲觀，高位追貨者都想走，而接貨人又唔會好多。由於此前升得太急，上升時未有整固，高位追貨者多，回落時段段都有大量蟹貨，支持位好難守得住，股價回落升幅一半以上，絕不出奇。
股仔急插 散水之象
市場上亦有資金散水跡象，港元匯價回軟，細價炒股又插，炒作資金由進攻變防守。上周五有幾隻細價股逆市跌得好淒厲，其中中國微電子(139) 跌46.6%；保興資本(1141) 插32.5%；合一投資(913) 挫26.3%。據聞中南證券係呢3隻股主要持貨人的經紀行，可能係同一個大戶掟貨出街，市場傳聞係同北水調走有關。
早前有好多資金流入港股，未必直接炒滬港通概念股，或者可以互聯互通的股票，而係借個市旺炒作其他股票，亦都炒到好狼，就以上述三隻股仔為例，由5月時低位至8月高位，中國微電子抽高6.8倍，保興資本升2.2倍，合一投資漲3.8倍！大戶一來已經收夠籌，二來見到滬港通無着落，佔中搞極都唔完，收水走人，徐圖後計，也不為奇。
要注意嘅係，股仔散哂，通常係大市轉弱嘅訊號之一，因為股仔之所以炒得起，非要大市興旺不可。大市轉弱，資金流走，股仔就跟住會散，而且會散得好快，隨時走唔切，所以炒股仔嘅朋友要特別小心。
未來一段日子，大市反彈後，還會再度尋底。今年大市見咗高位，已成定局，高位升穿25300點，以大市上下波幅4000點計，中線向下可以反覆走到21300點的水平。當然睇淡的最大風險是大市大幅反彈，主要可能帶動因素是美股見底回升，但估計港股彈到23500點就會遇上較大阻力，佔中未解決，好難上24000點，如何炒作自己計數，中線投資則未係入貨的時候，皆因未夠低也。
陸羽仁
金融High Tea 舊文