異動空間：滬港通完美巨伏
對炒友而言，滬港通完全是一個伏，仲要係巨伏！早市港交所(388)、券商股逆市炒起，皆因市傳上交所要求本港券商交20萬元入會費，「今次堅喇?！」一眾戰友在WhatsApp、Skype起哄。4月炒滬港通時的慘痛教訓，魏力又點會忘記？深呼吸，睇多陣先。睇住港交所1蚊1蚊咁上，第一上海(227)連衝十格，貪婪又再戰勝恐懼，魏力決定兩面包抄，先掃港交所，再追南京熊貓(553)。
點解係呢兩隻？滬港通一開，最受惠點都係港交所，雖然相對中資券商股會贏少?，但感覺夠solid，按倉比率又高，計過都算值博。至於南京熊貓，H股折讓近五成，加上具國企重組及注資概念，走勢又靚，中伏都有個譜。買完坐定定，午市初段兩隻都爆上，「今次仲唔報到仇？」點知開心唔夠半個鐘，隻隻都回曬塘，後來傳出墨西哥撻定，取消向中國採購高鐵，市場氣氛更差，恒指高位急隊近300點，埋單近800隻股跌，由開party變做小股災。
美元氣勢強盛，相對於歐、日及亞洲資產，港股相對吸引力下降，基金大戶拆倉轉戰海外，不無道理。細價股防守力弱，上周五已見散水跡象，小心！
魏力
http://www.facebook.com/2012jason
魏力
異動空間 - 魏力 舊文