金融High Tea 2014年11月10日
中國版馬歇爾計劃
2014年11月10日
上周五中港股市好似過山車咁，細膽一點都被嚇死。恒指上午腳軟軟，中午前跌到全日最低嘅23430點，跌219點，之後個零鐘內急抽400點至23831點，倒升182點，但好快又跌番落嚟，由升轉跌，然後橫行到收市，收市跌99點至23550點。散戶跟着炒，如果反手唔夠快，實會被拋出車外，唔死都好傷。
大市如此反覆，與兩大好壞消息先後出爐不無關係。直接拖累上周五大市嘅消息，是墨西哥政府突然撤銷了中鐵建(1186) 在當地中標嘅高鐵項目。消息令到一眾鐵路股大插水，中鐵建便在幾分鐘內由全日最高的8.58元，插水近8%至7.9元，收市報8.02元，全日跌5.8%；中國中鐵(390) 受拖累，命運差唔多，由升轉跌，收跌5.5%至4.85元。
工程叫停 鐵路股插水
墨西哥計劃在首都墨西哥城和製造業中心克雷塔羅之間，打造一條210公里長的高速鐵路。由於投標條件太辣，最後中鐵建係唯一投標公司，在上周一競標成功。至上周五，墨西哥總統涅托突然以避免「對投標過程的透明度和合法性存在的質疑」為由，決定撤銷中標結果，要重啟招標過程。妙就妙在涅托今日開始訪華之旅，仍然搞單咁嘅嘢，都明知會幾尷尬啦。比較合理的解釋是墨西哥的近鄰美國施壓，話佢唔可以咁樣批鐵路合約畀中國，在美國的後花園搞搞震，所以墨國總統唯有夾硬叫停工程批出，仲可能要賠錢畀中國。
阿爺近年大搞「高鐵外交」，足跡遍及南極洲以外的六大洲，有資料顯示，內地企業在海外取得嘅高鐵、鐵路合約，已經達到1300億人仔。樹大招風，西方國家有唔少反華力量，基於戰略、政治及經濟考慮，唔會袖手旁觀，任由中國的外交策略順利得手，中間梗會出現一定程度的障礙。今次的墨西哥事件，只係一個小挫折，無阻阿爺向外發展的大政策。「高鐵外交」只是阿爺在「走出去」大藍圖之下的其中之一小部分。
由去年的十八大開始，阿爺已經將「走出去」升級為國家戰略，在上月中，一個比較具體、無比龐大的「走出去」策略，已經浮出水面，就係中國的絲路計劃，在中國叫「一帶一路」計劃，即「絲綢之路經濟帶」及「21世紀海上絲綢之路」，有關規劃書在9月底上報國務院。至上周二，主席習近平主持召開中央財經領導小組第八次會議的時候，強調研究「一帶一路」規劃，並提出發起建立亞洲基礎設施投資銀行(AIIB)和設立絲路基金，最後在亞太經合會議(APEC)上，透露會出資400億美元，設立絲路基金。這數額比市場原先估計為大。
一帶一路 貿易大計
中國國際金融有限公司(中金)在上周三發表報告，列出「一帶」涉及的國家、發展項目及路線，發展的項目包括高鐵鐵路、公路、航空以至核能項目，涵蓋亞、非、歐洲，國家包括泰國、越南、印度、埃塞俄比亞、尼日利亞、安哥拉、德國、羅馬尼亞、英國及俄羅斯等。「一路」則分成陸路三個方向及海路，北線經哈薩克斯坦、俄羅斯、白俄羅斯、波蘭，到達北歐；中線由吉爾吉斯坦、烏茲別克、土庫曼、伊朗、土耳其至南歐；南線由中國至巴基斯坦。海路由太平洋向西，經印度洋到達大西洋東岸，沿途經過印尼、馬來西亞、菲律賓、新加坡、泰國、汶萊、越南、老撾、緬甸、柬埔寨、南亞、西非、北非、歐洲等地。
值得注意的是在上月底，包括中國、印度、新加坡等在內21個國家簽約，成立亞洲基礎設施投資銀行，進入籌備階段，這個亞投行也是由中國一力推動成立。北京APEC會議主題之一「加強全方位基礎設施與互聯互通建設」，同時也是「一帶一路」的主要建設內容，有消息估計，這個中國大計，將會於APEC會議後正式啟動。
媒體稱阿爺這個「走出去」策略為中國版「馬歇爾計劃」，可以講係中國經濟以至外交政策方面的巨變，不可忽視。
美國在1948至1952年實行「馬歇爾計劃」，期間共撥出接近132億美元，援助西歐用於採購包括糧食、飼料、化肥等物資以振興經濟。「馬歇爾計劃」的推動，不僅令歐洲在4年內恢復至二戰前水準，更重要的是美國能夠大量輸出過剩產能，製造業及出口增速由谷底顯著回升，為美國帶來了十多年的繁榮。
基建產能 大量出口
在20世紀60年代，日本有過類似的成功經驗。日本將國內過剩、或者係夕陽產業的產能輸出海外，刺激出口之餘，又為國內的朝陽產業同技術的升級創造空間。中國近期經濟放慢，各行各業都出現不同程度的產能過剩問題，如何將中國的過剩產能、等同是基建「走出去」已經係阿爺的頭號課題。中國版「馬歇爾計劃」，實有借鑑美國扶助歐洲經濟的「馬歇爾計劃」的意思。
中國有錢、有產能、有基建技術，隨着歐美經濟放慢，自身的基建投資又投得七七八八時，產能過剩用不着的問題愈來愈嚴重，成為中國經濟進一步發展的樽頸。在中國到歐洲這幾條陸海絲路的沿線國家，當中有不少是低度發展的國家，無錢、無產能、無技術，經濟發展不起來，如今中國帶埋錢同技術來投資，基建弄起來，把高鐵或公路打通增加貿易流動性，光是人力都可以運用起來，所以中國提出真是各參與者共贏的方案。也只能由中國這種大國來推動，因為經濟強但體積小的國家如南韓，就無力推動這種大計劃，因為和南韓交通聯通沒有太大吸引力，參加中國的計劃，向東聯通中國，向西聯通歐洲，誘因大得多。
中國「馬歇爾計劃」的阻力在美國，中國若然成功，經濟發展會推上另一個新台階，不止未來十年還可以維持相對高速的增長，國力會大大增強，自然不是美國樂見之局。但美國光從政治上阻撓，不能在基建投資上提出替代方案，恐怕難阻好多亞洲國家參與中國的馬歇爾計劃。
鐵路股回 趁低收集
有內地證券商推算，單係亞太區域未來十年間的基礎設施投資需求，將達8萬億美元，潛在空間巨大。要成功走出去，首先要做好的自然係內地的出口門戶啦，因此，計劃最新受惠的便有6個省嘅6個港口，包括連雲港、寧波港、泉州港、廈門港及北部灣。主要受惠行業有5個，包括交通運輸、建材、能源建設、商旅文化及製造業等，鐵路股更係食正條水，公路建設股也可以分到飯食。
有分析估計，未來「絲綢之路經濟帶」區域鐵路線路總長在一萬公里左右，投資額預計3000億至5000億元人民幣左右。中金日前就推薦多隻政策受惠股，包括中鐵建、上海電氣(2727) 、中國中冶(1618) 及中聯重科(1157) (中聯重科應收帳超高有點問題)；花旗則建議買入中國中鐵及中國北車(6199) 。
由於墨西哥高鐵要再投標，未知吉凶，市場估計中鐵建及中國中鐵股價仍未跌完，仲可能跌多10%。我認為在中國版馬歇爾計劃的啟動後，鐵路股、公路股基建股甚至建材股長線有前途。不過，近期炒這個馬歇爾計劃，不少股份升幅頗巨，例如中冶，一年低位1.23元，現價2.27元，升咗近一倍，雖然長線睇好，怕佢一回都要回番唔少，高追有風險。反而鐵路股借墨西哥事件衝擊，中鐵建及中國中鐵股價可能仍未調整完，可以等佢哋股價跌低啲吸納，分段買入睇長線。
滬港通或翻炒
阿爺因為佔中暫停滬港通，但港官就起勢追叫快啲通，特首梁振英在北京話，內地有關部門將於近期宣佈「滬港通」的正式開通日期。若然係咁，滬港通股又會炒番一炒噃。但我仍然唔係咁樂觀，怕只是語言偽術，佔中一日未解決，滬港通都通唔到。所以炒吓無妨，咪信十足。
陸羽仁
金融High Tea 舊文