一周三件：中鎳估值平抵博
■董書通任主席的中鎳資源，現價0.245元，PB僅得0.25倍，值博率高。 資料圖片
湖南有色（2626）阿媽，計劃以高達3倍PB，私有化湖南有色，場內中鎳資源（2889）嘅PB，未計任何增值，家陣PB得0.2咁大把。
中鎳主打礦石貿易，鎳精粉（不鏽鋼原材料）同鋼材產銷，呢期兼加埋勁有前景嘅特鋼生產。中鎳去到今年6月嘅NAV1.03元，現價（0.245元）PB得0.25倍，好吸引，但條數未計完。
生產特鋼前景亮麗
中鎳上年頭公佈，話出售南洋礦業30%權益，代價近11.4億元，獲利9億元。中鎳半年度成績單講，呢壇製作，預期今年尾完成。單係呢壇出售，現金一回籠，中鎳淨借貸比率，將會跌到得25%勁安全水位。又呢次出售變現，相當於中鎳每股0.43元，遠超過現價，兼每股獲利/增值0.34元，係現價近1.4倍！
若果按呢壇交易獲利百分比計數，南洋礦業總權益潛在增值，係高達30億元，相當中鎳每股1.13元，中鎳NAV係2.16元，PB得0.11倍。無論以場內資源股，或者鋼材股比較，中鎳PB平咗一大截。
中鎳開特鋼瓣數，年產50萬噸特鋼規模，已經搞掂。呢壇製作，食住祖國包括軍工、航天、武器等等，對高質量鋼材龐大需求。尤其前邊嘅軍工，未來產業規模，斷萬億元人仔計數，呢part業務，有前途。
祖國特鋼股大冶特鋼同西寧特鋼上到1.5倍PB、南京特鋼都講緊1倍，中鎳又係大折讓咗近90%！上邊湖南有色獲阿媽提私有化，股價創咗三年新高，中鎳家陣潛喺八年大底，比2007年高位5.46元，大跌咗96%，殘到爆。
買中鎳，當翻半番到0.375元計，都仲未上到一年高位0.4元，PB都係得0.17倍，比起任何行家，仲係超吸引。
錢雋
細價股專家
本欄逢周二、三、五刊出
錢雋
一周三件 - 錢雋 舊文