一周三件：國美低殘勁抵博
■國美電器業績靚但股價低殘，而國美在線具增值潛力尚未反映，值博率高。 資料圖片
國美電器（493）有靚爆鏡嘅業績，而「國美在線」更有勁肥仔增值潛力，卻又未反映出嚟，但股價由9月醞釀滬港通，去年11月中旬正式通車，再到家陣就累跌咗24%，已跌到落2008年金融海嘯價水平，係至殘嘅一隻滬港通股，勁抵博！
在線業務潛力大
國美喺今年頭九個月嘅盈利大幅增長75%，達到10.2億元（人民幣．下同），就當全年盈利只係keep住呢個水位，已經可以增長14%，兼有得炒盈喜。專業評估，國美在今、明年度嘅EPS分別係9.8港仙同0.11港元，增長44%同14%，明年預測PE得10倍。
行家蘇寧今年上半年大出血7.5億元，專業評估繼續見紅，冇PE。但蘇寧由9月頭到家陣，累升咗近28%，市值858億港元，係國美187億港元嘅4.6倍。國美竟然殘成咁，有冇搞錯？
祖國報章新鮮熱辣報道，據艾瑞諮詢（iResearch）統計嘅數據，國美旗下國美在線喺剛啱過去第三季，B2C購物網站交易規模市場份額2.5%，兼由今年初嘅第9名，躍升到第5位。而呢瓣業務正係發力，兼且好有上市嘅潛質。而家陣已經喺花旗上市嘅京東商城，市值高達340億美金，折約2,652億港元，係國美市值嘅14倍。
又京東商城家陣5.5倍PB，國美唔夠1倍，數據已經係吸引到痹，又諗到嘅係，若果國美在線真係上市的話，國美增值潛力，真係不得了！再講，國美到今年6月嘅淨現金，近200億港元，又係超過本身市值，股價再跌有譜，但一turnaround，彈動力可以好驚人。
煲中線，當翻一番到兩蚊，國美市值先得374億港元，亦未追到蘇寧2.5倍PB水位，仲係勁吸引。
錢雋
細價股專家
本欄逢周二、三、五刊出
錢雋
一周三件 - 錢雋 舊文