異動空間：明年五個反高潮
人人想預知未來，但預測建基於現有資料，用倒後鏡睇未來多數錯。股市就是少數贏多數的遊戲，大圍睇升的話多數開對家。今年不妨用逆向思維預測，睇嚇準唔準！
1）滬股見5000點？中國經濟要放水去救，有幾掂心照。股市行先於經濟，但不會長期放甩經濟，若首兩季數據唔對辦，1萬億元孖展散水諗起都驚，社科院講又點？明年底滬股隨時仍是2字頭。
2）濠賭冇運行？冇錯，阿爺落力打貪，豪客絕跡貴賓廳，但龍頭銀娛（027）、金沙（1928）已回落四成，加上賭是人的天性，毋須太悲觀，3月業績後應是買貨良機。
3）殼股繼續癲？有傳小加擬在港股引入停板機制，若與A股睇齊，點解仲要買殼？呢隻殼股黑天鵝不可不察。
4）供應少建築費貴，樓價繼續升？日日破頂成交，新盤被搶購一空，劏房、懸棺露台、新居屋，總之上咗車先算。不問價追貨，感覺不對勁，明年睇跌。
5）日圓繼續跌？安倍靠貶值日圓救國，谷通脹、助出口，但人口老化、環球需求放緩才是問題核心，飲鴆止渴難持久，日圓明年隨時反彈。
魏力
http://www.facebook.com/2012jason
魏力
異動空間 - 魏力 舊文