金融High Tea 2014年12月30日
邊揸邊炒
2014年12月30日
港股假後追落後，由國企股帶動曾升過近五百點。雖然指數表現強勁，但升勢側埋一邊，如果無買中資金融股同鐵路股，好大機會只能睇住人賺錢，甚至有指數升手頭組合跌的狀況。有中環茶友話，咁嘅市如果無膽順勢而炒，就真係得個睇字！
內地A股係幾日假期爆升，牽動多隻同指數掛鈎嘅ETF跟住爆上，個別升幅差不多有一成。指數升得咁勁，主要係中央再出招，放寬銀行存款的計算方式，產生變相降低存款準備金的效果，話等如三次降準，可以放出1.6至1.8萬億貸款咁勁，銀行股成為得益者，跟住推動埋間接受惠的保險同證券商股，另外鐵路股係「一路一帶」概念推動下再上。
A股呢一輪升勢，可以話係一個巨型政策市。中央為了力保經濟增速，開始大力注入資金，金融機構成為首先感受到好處的環節，於是銀行股升完又升。不過，因為內地消費同出口仲未見有明顯起色，其他板塊仲未能大幅趕上，結果變成中央不斷出招催谷，金融股就升完再升，如果你唔夠膽上車，咁就只能望牛興歎。
內險艇股望鄉情濃
除咗銀行股，內銀股係呢次牛市係升幅好唔錯嘅股票，第四季幾隻龍頭內險股累升五成或甚至更多。內險股主要係跟住A股回升，上半年內地股市死氣沉沉，內險股反覆尋底，點知第四季佢哋紛紛發威，令不少專家大跌眼鏡。?家內險股浦頭，三隻龍頭國壽(2628) 、平保(2318) 、太平(966) 都創了一年新高，今年入貨者都有錢賺，就算好多高位入咗貨的股民都開始鬆綁，有茶友形容佢哋望鄉情濃，好心急希望可以返回買入價，咁就一身鬆晒！
茶友的講法確係反映咗唔少股民心聲，因為內險股曾是唔少股民至愛，好多人高位追貨無止蝕，結果潛晒落水。遇着呢個狀況，有人無眼睇放埋櫃底懶理，有人死守之餘，見到股價有機會返上買入價，就好心急希望鬆綁離場。
不過，如果你信A股仲有得炒，內險股基本上係曲線投資內地股市的工具，係升市沿途都有得玩，有貨在手者返到鄉下，都仲可以守吓。比較穩妥方法係揸吓炒吓，見佢破位上升不妨食小小胡，回番又入貨。要留意係如果個市係反覆上升，番兜個市就唔可以訂得太低，放貨就最好等佢破位先沽，否則個市一路升上去，就有可能落咗車上唔番車。
恒指假後升咗423點，收報23773點，國企指數收12019點，升461點，成交僅多過八百億小小。由於國指升幅遠大過恒指，好多以本地為主的公司股價都無郁，咁固然係因為港元同美元掛鈎，資金成本同內地趨降相反，有向上壓力，同時都因為本地營商環境真係充滿挑戰。好似新華社昨日進一步披露廣東、天津、福建三個自由貿易細節，其中廣東面積最細，呢個不排除因為香港無參與所致。繼上海外三個自貿區枕戈待發，?家市場已經傳言呢幾個自貿區容許發展個人免稅網購，產品包括不少自由行來港掃貨的消費品，若然傳言無錯，對本港零售商會係不可忽視的壞消息。
三自貿區威脅零售股
過去聖誕同農曆年前後，是自由行來港掃貨高峰期，對莎莎(178) 、卓悅(653) 係報佳音的日子，但今年似乎再聽唔到這些聲音。零售商估計，今年聖誕黃金期銷售能夠和去年打平已算好彩，將來如果阿爺准許用網購形式低稅甚至免稅入口消費品，這些零售股可能仲有第二波衝擊。
對於內地係咪容許個人網購免稅同香港零售商競爭，有茶友話有危就有機啫，使唔使咁擔心呀？陸羽仁都同意呢個講法，不過要留意係股價永遠係炒前景，零售股自年中開始回落，?家雖然唔確係長期見頂，但走勢值得關注；再者，係香港愈來愈有邊緣化危機。
兩年前開始，香港人唔歡迎內地人嚟買奶粉，繼而唔歡迎佢哋嚟買樓，現時雖然樓價不斷創新高，但都係香港人塘水滾塘魚居多，升細價樓唔升大價樓如果繼續咁落去，香港會係危而有機，抑或危而失機呢又？
陸羽仁
金融High Tea 舊文