魚樂無窮：溫故知新迎戰新一年
■唐牛今年撲中唔少爆升股，都算交到功課。 資料圖片
2014年話咁快又到尾聲，趁年底做一個檢閱，溫故知新！唐牛舊年底講，濠賭科網股長炒長有，前者只啱咗一個月，後者亦僅得一季貨仔，之後齊齊game over。
雖然之後有補飛話中資股翻生之時，就係濠賭科網股玩完之日，但中資股年底先認真發力，中間有啲時差，準確度只得兩粒星！
心水板塊方面，預測醫藥股及物流股大熱，前者贏足大半年，只係年尾資金大挪移，始由高位回落。物流股亦有類似情況，推介兩隻股份鳳凰醫療（1515）及嘉里物流（636），今年平均升幅一成過外，比上不足，比下有餘了，準確度四粒星！
至於冷腳敲思捷（330），博炒歐洲復蘇，最後全軍覆沒，準確度五粒星……如果當係燈咁睇呀！
講今年轉軚次數，其實有幾次——由新經濟股轉去殼股，再由殼股轉去中資金融股，大方向尚算正確，亦撲中唔少爆升股，例如萬威（167）、亞洲聯網（679）、星光集團（403）、英皇證券（717）等，近期嘅華夏滬深（3188）、銀河證券（6881）都交到功課，希望可以彌補到其他推介嘅不足。
喂，認夠叻未呀？話我知嚟緊有乜股炒仲好啦。希望大家都明白，唐牛都係人，都有holiday mood，講多幾句將格仔填滿都得啩。明年策略？聽日再講！
唐牛
https://www.facebook.com/tongcow88
唐牛
魚樂無窮 - 唐牛 舊文