金融High Tea 2014年12月12日
加快放水
2014年12月12日
美股繼續調整，市場焦點繼續係兩個。一個係「鐘」極清場；另一個係A股表現。恒指開市即軟，以美股杜指都跌二百幾點計，港股表現算係咁，或者因為之前已經跌咗。佔領行動告一段落，過程無出現重大傷亡，真係險過剃頭，亦係不幸中大幸，陸羽仁成日講，錢無咗可以搵過，命無咗就無Take Two，最緊要係大家平安！
至於內地A股，經過黑色星期二大震盪後，市場仲係上落格局，觀望緊中央有乜政策。外電引述消息人士話，人民銀行要求全年新增貸款控制在10萬億元人民幣以內，各間銀行已開始增加放貸規模。
消息指，自10月開始，貸款額度已經打開，存貸比率不再是限制，唯一制約貸款的因素只有資本。人行早前公佈數據顯示，首十個月的新增貸款為8.23萬億元，去年全年則為8.89萬億元。市場預期，11月新增貸款將升至6300億元，較10月增加15%。按此推算，銀行要在12月增加貸款至1.14萬億，全年才達致10萬億元，所以有消息指最近銀行已大力放水。
經濟會議加大谷經濟
中央放水短線一定係盡力推高GDP追吓數，另外亦有抗通縮的考慮。經濟慢、天氣好，食物供應充足，加上國際油價下滑，令物價水平回落，牛奶平到要倒。國家統計局昨日公佈11月全國居民消費價格指數(CPI)按年微升1.4%，增速較10月回落0.2個百分點，低於市場預期，並創五年新低。通縮隱憂步步進逼，分析認為人行有必要進一步放鬆貨幣政策。
市場焦點係剛結束的中央經濟工作會議點定來年增長指標，話要「努力保持經濟穩定增長和積極發現培育新增長點」，除了照講「繼續實施積極的財政政策和穩健的貨幣政策」之外，又話「積極的財政政策要有力度，貨幣政策要更加注重鬆緊適度」，又係增加中央用錢和放水的暗示。
由於A股仲喺黑色星期二的陰影下，港股見到美股下挫一度跌成355點，收市仍跌逾兩百點，險守23300收市。恒生指數收報23312點，跌211點；國企指數收報11255點，跌117點，成交金額縮至981億元。市傳中證監下周查證券商兩融槓桿，早前受力捧的證券股沽壓明顯。中信證券(6030) 瀉7%；海通證券(6837) 是最差國企指數成份股，插咗8.4%。
中廣核(1816) 持續受追捧，首日掛牌飆近兩成，昨日繼續走高，收報3.62元，再漲9.4%。申銀萬國發表報告，預測中廣核電力(1816) 四年複合增長率21.8%，是清潔能源之王，首予「買入」評級，目標價4.54元，相當於預計2015年22.4倍市盈率。另外物業抵押貸款公司環球信貸(1669) 今日掛牌，暗盤報1.48元，較招股價1.35元高10%。
匯控創今年新低
全球主要股市都係高位徘徊，港股變成斯人獨憔悴，匯控(005) 更加唔掂，昨日就跌到去75.55元的一年低位。本來歐債危機穩定下來，美國復甦都被理解為有利匯控的因素，無奈係仍然受惠唔多，主要係歐洲銀行業仍受不景氣拖累。匯控無啖好食，仲被監管當局得閒就照吓肺，可以話相當慘情。
有金融界茶友話，西方?家瀰漫反金融霸權的心態，銀行業難做，尤其你唔係自己友，隨時被人踩多兩腳，匯控「蛇」落到今年低價，大致反映呢個環境，你話如果內銀要走出去，結果會點可想而知！
陸羽仁
金融High Tea 舊文