金融High Tea 2014年12月4日
造淡之心未死
2014年12月04日
油價大跌，觸動一場「商品量寬」，喺低油價推動下，生產成本大跌，車主入油佔日常消費不輕，美國消費者變相多咗錢使，呢個因素令美股再闖高峰，升上歷史新高，不過，呢隻老牛不無疲態，最明顯係科技股大哥蘋果「閃跌」3%，引發科技股係咪已經見頂的疑惑。
睇番過去幾個月資金流情況，先係美元轉強，拉動熱錢回流美國，商品價格係呢個環境下偏軟，加上地緣政治因素，觸發伊斯蘭國同產油國推低油價。
傳統上低油價利好股市，但同時有機會引發通縮，變成賤物鬥窮人。
中美齊旺 香港獨衰
鬼佬金句One man"s meat is another man"s poison(吾之美饌，汝之毒藥)，美國正處復甦，經濟升溫，有小小加息壓力，遇上低油價好似飲涼茶降溫，所以美國聯儲局副主席費希爾走出來放聲氣，話有可能押後加息，可見呢劑對美股來講就係上肉，不過，對好似香港呢類唔係用油主導的經濟，好處唔大之餘，仲有小小驚被人扯走資金的擔心。但對內地來說就不壞事，低油價令生產成本下降，只擔心通縮，可以放手刺激經濟。
有中環茶友笑言，內地過去兩年收緊銀根，搞到滬指一度跌到1949點的國策市，一個熊市咁樣，跟住管理層開始定點降準，個市變咗「鬆弛熊」，開始好番，到第四季鬆綁力度加大，隻熊仲變埋牛。一向好講驚人高論嘅摩根士丹利又發表大預言，估計A股會在18個月大漲一倍。
外電引述大摩駐香港的亞洲及新興市場策略主管Jonathan Garner的報告，此君曾在6月份預計中央推出貨幣刺激政策，將推動中國股市在下半年大漲，佢話：「新開戶狀況表明，投資者在大力參與股市投資，高成交量的行情應得到重視。」他看好醫療保健以及科技等「新經濟」行業和金融股。
追逆市奇葩係高危玩意
雖然外資唱得咁好，但陸羽仁一向都係冷靜派，認為大戶贈興，散戶就要冷靜，A股前景而家的確無法敢睇衰，但短期佢升得咁急咁快，風險已經上升，如果係想長線投資，應該唔係高追時候，你話短炒，咁就要考你身手啦。
內地股市熱到有點發燒，港股變得仲難玩，恒指昨日高開近百點，但中午已經倒跌。呢排個市波幅增加，外資似乎造淡之心未死，見到成交大之外，沽空仲係累積緊，看來造淡一方仲係想搵機會造低個市，我都係講句，最好大戶插得低啲，咁就有機會撈貨，如果機會未到，咁就要有耐性等等先。
由於內地股市未能企穩2800點，港股午後倒插276點低見23378點，恒生指數收報23428點，挫225點；國企指數收報11060點，跌65點，成交近1232億元。
油價再度急跌，石油股固然受害，石油服務股仲慘，巨濤(3303) 大跌12%，造1.42元；華油能源(1251) 挫7%，造1.53元，其他海隆控股(1623) 、山東墨龍(568) 、安東油服(3337) 全部跌3、4%。
藍籌仲有比亞迪(1211) 大跌，油價跌本來不利電動車股，它的插電式混能車「唐」，要延期至明年1月上市，股價應聲急瀉9%，更是表現最差國企指數成份股，呢批股民都幾傷。
跌市中個別中資金融股仍造好，累升不少的中州證券(1375) 再飆7%，造5.98元，呢啲逆市奇葩追佢都要小心呀！
陸羽仁
金融High Tea 舊文