陸羽仁 BLOG 2015年1月23日
小口徑火箭炮
2015/01/23 08:10:13
網誌分類: 經濟
歐洲央行推出比市預期更大手筆嘅量寬（QE）計劃，睇股市恐懼指標VIX指數再插13%至16.4嘅近期低位，歐美股市齊齊炒上，反映投資者肯收貨。歐洲股市平均升1.7%，創了2007年底以來新高，其中德國股市漲1.3%，創了歷史新高。美股亦唔執輸，杜指及標普500指數齊漲1.5%，杜指升260點，收報17814點；標普500指數升31點，收報2063點；納指表現仲好，漲83點至4750點，漲幅1.8%。
事實上，美股對於歐洲央行搞刺激經濟措施的反應一向都好正面，而且屢試不爽。雖然歐央行正式推出QE係第一次，計埋今次，歐央行行長喺2012年已開始，已經提出過9次，話如果有需要，將「不惜一切手段」（whatever it takes）推出刺激經濟計劃，佢每次提出，標普500指數當日就會炒上，百份百靈測驗，而平均升幅1.4%，反而歐元區主角，炒上的機會率只有87%，9次中只有8次炒上。而升幅就比較大，平均有1.7%。歐洲泵水，股市係贏家，輸家自然係歐元，歐元兌美元，9次提出刺激經濟計劃，4次都下挫，昨日，歐元兌美元再跌0.07%至1.1357美元。
近期加拿大央行、瑞士央行先後降息，日本央行擴大增長融資機制，英國央行一致同意不上調利率。德國總理默克爾絯又話，歐元區結構性改革刻不容緩。喺咁嘅情況下，市場已經預期歐洲央行要泵水救市，問題只係規模而已，而市場當然希望歐央行推出一個火箭炮式巨大計劃。所以上日有消息話歐央行提議嘅規模只係一年6千億，市場反應麻麻，唔係幾肯收貨啦。
昨日，歐版QE終於掀盅，歐洲央行行長德拉吉(Mario Draghi)宣佈維持基準利率不變，每月採購600億歐元資産，持續到2016年9月，估計QE會由3月正式開始，持續19個月，共計總額度為1.14萬億歐元。對於歐版QE正式推出，國基會（IMF）總裁拉加德（Christine Lagarde）表示，每月購買600億歐元國債的計劃將「大大加強」歐洲央行的寬鬆政策，從而幫助降低歐元區的借貸成本，推高通脹預期。
睇歐美市場反應正面，投資者都肯收貨啦。其實，每月600億歐元比500億，唔係多好多，未至於去到一個早前預期嘅「火箭炮」咁勁，只屬小口徑火箭炮。不過，投資者亦開開心心收貨，我覺得要歸功於歐洲央行今次推出QE嘅編排做得唔錯，管理到市場嘅期望，首先，喺QE未掀盅前夕，先有官員爆料試試水溫，睇睇市場反應，見到市場覺得6千億歐元太少，在提醒投資者唔好對QE規模抱有太大期望嘅同時，推出一個比爆料大嘅計劃，投資者就收貨啦。
歐洲泵水，勢將進一步推低歐元，從而推高美元。對美國經濟，尤其係出口方面將帶來一定影響，美國出口現時佔了GDP大約15%，而歐洲市場又佔了美國出口市場的15%，所以歐版QE會對美國經濟形成壓力，又可能會推遲聯儲局加息的時間。
對於股市嘅影響，有分析指出，歐美股股市都會得益，相對而言，歐洲股市雖然已經升上7年高位，但由於歐洲股票此前跌得太過殘，估值相對比美股仍然低，預計會跑贏美股已於市場，今年到目前為止，歐洲股市升了5%，而標普500指數剛剛收復失地。
陸羽仁
回應(0) 我想回應
陸羽仁 BLOG 舊文