中環迷你裙：港股李香琴上身
■眼見港股長期李香琴上身，龍門唔見守得好，令Samantha嬲嬲哋。 資料圖片
「點解仲未收市？」Samantha近日經常將呢句嘢掛在口邊。成份股起勢乾挾，喺阿爺MLF和逆回購連環放水下那隻純利增1.3倍的盈喜股中國太平（966）由升7%，尾市收窄至不足1%。眼見港股長期李香琴上身，升得慢都算，龍門又唔見守得好喎。嬲嬲哋，重投二三線板塊股懷抱？下場睇怕仲慘。叫大家停一停，諗一諗，因為唔少滬港通落鑊炒嘅概念，已打回原形，這番跌浪既急且快，睇圖觸目驚心。戰友話，今次滬港通升浪，簡直係圖表killer，搵唔到食不特止，仲要輸錢。其實學投資版前輩話齋，樂觀去諗，圖表可以係hero，用嚟止蝕，堅得，跌穿下降軌唔斬？到跌三成先狠狠斬落去時分分鐘連命都冇喇！
今日推介首都機場（694），憧憬的是北京興建第二機場的概念。事實上，論機場質素和效率，美蘭機場（357）評價向來好過首都機場；論業績，公司中期純利僅增0.7%，至6.78億元人仔，但股價半個月推高逾兩成，禮拜一大跌市僅跌2%，證明此股有本事。
首都機場吞吐量已飽和，淪落至有生意都冇得做的境地，新機場家陣唔係由上市公司承擔，優點係可搞掂自己個場先，等時機成熟，再分段注資。此股需要點耐性，可在7.5元先買一注。
Samantha
本欄逢周三、五刊出
https://www.facebook.com/stocksamantha
Samantha
中環迷你裙 - Samantha 舊文