金融High Tea 2015年1月23日
跟燈慢走
2015年01月23日
內地股市坐完一輪過山車，昨日一度倒跌，尾市再度回升，終於三連升收市。港股表現都唔錯，指數一度再升上兩萬四千點高位，由於中資金融股尾市略為回軟，升幅稍為收窄，似乎大家經過A股暴跌後，開始收到中央想個市升、又唔想佢升得咁快嘅訊息，大家跟住紅綠燈，慢慢走、勿亂跑。
人行放水符市場預期
人民銀行透過逆回購，向市場放水500億人民幣，是相隔一年後，人行再在公開市場進行逆回購操作。人民銀行行長周小川在瑞士達沃斯論壇上表明，無意向市場注入過多流動性，影響投資氣氛。我分析就係經濟唔好阿爺都要放水救市，但去年11月減息後股市升得太癲，十分頭痛，想用機制放水都唔敢放住，要搵中證監出手打一打，等個市窒一窒之後，先至再放水。只要唔係升得太癲，仍可睇好，可見回吐時低吸紅色股。
雖然中央有動作下，但內地股市已升咗兩日，滬市上半日反覆偏軟，曾失守3300關，午後開始見有追捧，帶動滬市穩步上揚，上證指數收報3343點，漲19點；深成指收報11471點，漲99點。兩市成交7142億元。
在A股帶動下，港股上破24500點，恒生指數收報24522點，升170點；國企指數收報12047，升25點，成交減至995億元。最搶眼嘅係申銀萬國(218) 與母公司與宏源證券合併完成，帶挈股價爆升，全日收造8.08元，狂升36%，升幅是港股之冠。獲西南證券入主的敦沛金融(812) ，股價都飆咗8.7%。
民企內房近日備受負面消息困擾，深圳為基地的幾間內房商接連出事，最受關注的佳兆業(1638) 已經出現違約，事件繼續發酵，《界面新聞》報道，農行(1288) 一筆由佳兆業擔保的2億元貸款即將被計入不良貸款。
佳兆業等白武士打救
有傳深圳市政府正與數間房地產商洽談對陷入危機的佳兆業作出投資，當地政府不希望佳兆業的股份以折讓方式出售。佳兆業發言人表示不會作出評論，由於呢單事件已經由政府插手，股東命運相信要等白武士出現先至可以明朗。我判斷內房股不致全面出現系統性風險，揀底子比較強的股份低吸，仍有可為。
市場焦點集中喺中資股，大行報告少咗睇香港公司。里昂剛發表報告，料本港寫字樓租金進入上升周期，轉軚睇好太古地產(1972) ，將評級由「跑輸大市」升至「跑贏大市」，但目標價由28元降至27.5元。
太地在內地主要做商場項目，呢類物業供過於求，加上受網購衝擊，唔係咁易做得好，太地勝在有品牌效應，營運條件較佳。?家大市焦點轉咗去中資股，唔係呢類傳統股份身上，所以欠缺炒味，好處就係估值唔貴，適合保守人士低吸作為保值工具。若然要炒，都係炒紅色股。
陸羽仁
金融High Tea 舊文