中環在線：陳豪、羅寶文無緣合作
「咖啡王子」灣仔睇舖開咖啡店
■陳豪（圖左）同羅寶文（圖右）原來爭啲啲就做到生意拍檔。 設計對白
有「咖啡王子」之稱嘅藝人陳豪一直都話想開番間咖啡店，噚日佢就落咗去灣仔利東街、𠵱家仲起緊嘅商場「囍歡里」睇舖，但未撲槌。據聞，富豪酒店（078）太子女羅寶文都曾經諗過搵陳豪喺富豪旗下酒店開咖啡店，省嚇招牌，可惜最後二人無緣合作。
灣仔利東街（囍帖街）拆卸後，原址變成豪宅「囍滙」同埋商場「囍歡里」，「囍歡里」現正進行招租。陳豪噚日下晝兩、三點左右，就喺租務代理陪同下，同埋朋友一齊去到「囍歡里」睇舖。
■陳豪（中）噚日喺租務代理（右）陪同下到「囍歡里」睇舖。相片由讀者提供 曾構思富豪旗下開店
由於現場仲係地盤，陳豪要戴上地盤安全帽去睇舖，睇見佢指手劃腳咁，不停對住身旁嘅租務代理問問題，問到呢位代理哥哥摸曬下巴都唔識答咁款，就估到陳豪對開舖呢件事十分之認真。佢旁邊戴住黑超嘅朋友就相對沉默冷靜嘞。
陳豪噚晚都承認佢係去睇舖，強調𠵱家只係好初步搞緊，未有具體投資金額或者想點樣做。除咗租，亦都可能考慮買舖，一切都未定實咁話。咁都啱嘅，佢老婆陳茵媺（Aimee）下個月就生第二個BB，𠵱家當然係BB緊要啲先，舖就可以慢慢揀。
不過，華華聽聞其實陳豪可以一早就開咖啡店，事關富豪太子女羅寶文曾經有諗過搵佢合作，請佢喺富豪旗下酒店開店，最終卻合作不成，羅寶文亦搵咗其他租客。的確，要傾出雙贏嘅條件唔係易事，呢次合作唔到咪下次囉。
講番陳豪睇嘅「囍歡里」，發展商預計今年第三季交舖位畀租戶，第四季就可以開業。商場地面舖位呎租叫價約二百元，地庫舖呎租約一百元，目標租客正正包括咖啡店。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文