魚樂無窮：流感概念股滄海遺珠
■百本醫護近日股價見異動。圖為集團主席關志康。 資料圖片
上周末過大海，賭場人氣弱乃意料中事，最令人震驚嘅係，有大型賭場電子百家樂最低投注額竟然係五十蚊！呢個銀碼通常只會喺細場見到，連大場都做到咁爛，濠賭股尋底之旅有排未完。
流感肆虐香江，死亡人數每日遞增，從投資角度出發，醫療相關股最有計。主打診所保健服務嘅康健（3886）今年由1.2元水平出發，兩個幾月已經炒到上2.86元，累升1.4倍，完美食正概念。港股市場咁大，冇理由只得一隻概念股，翻箱倒籠後，終於搵到另一隻潛在爆升股——百本醫護（8216）。
百本細細粒容易炒
百本醫護主要在港提供醫護中介服務，為醫務人員及公私營機構提供配對服務。唔好以為八字頭冇料到，百本市佔率超過四成，係行業龍頭，喺流感高峯下，醫護人員需求肯定有增無減，其手頭已登記醫護人員超過1.34萬名，公司透過介紹從中抽傭，肥過肥仔水。
從股權架構出發亦滲出淡淡炒味。大股東持貨七成半，以市值3.5億計，街貨只值幾千萬，有心人要舞上易過借火。睇埋圖，股價已橫行超過半年，貨源應該收得七七八八，近日股價見異動，只要突破一元阻力，可以升到你唔信。用0.8元做計數位，一成buffer博一倍升幅，制得過。
唐牛
https://www.facebook.com/tongcow88
唐牛
魚樂無窮 - 唐牛 舊文