中環在線：保利跟風賣Hermès袋
下月春拍 估價最貴90萬
【愛馬仕】特別訂製翡翠綠、桃紅和藍色尼羅鱷魚皮30公分柏金包 2014年製 估價70萬至90萬元
國際拍賣行佳士得舊年底首次在港拍賣名媛、闊太至愛嘅愛馬仕（Hermès）手袋，反應熱烈，保利文化（3636）旗下保利香港似係跟風，下月舉行兩日春拍亦會拍賣超過五十個Hermès手袋，估價由五千元至九十萬元。
【愛馬仕】亮面鮮紅色尼羅鱷魚皮30公分柏金包 2013年製 估價45萬至65萬元 保利珠寶及鐘錶部門主管于文浩承認，因為見到市場有需求，由舊年開始籌劃拍賣Hermès手袋，得到好多「熱情的藏家」支持，先至搜羅到呢五十幾個有錢都未必買到嘅手袋。
佢希望呢批Hermès手袋可以吸引一班女顧客參與今次拍賣，順便留意埋其他拍品。不過，保利今次只係牛刀小試，未有為Hermès手袋設專場，而係放入珠寶與鐘錶專場一齊拍賣。
相對一幅名畫閒閒哋過百萬，甚至過千萬，一個Hermès手袋由五千元至九十萬元，入場費確係低好多，于文浩都希望「（手袋）全都拍（賣）出去」，若然成功，將來可以考慮增設名貴手袋拍賣專場。
【吳冠中《濱海城市（青島）》】估價待詢 吳冠中油畫成焦點
手袋之外，今次春拍嘅焦點拍品，係吳冠中於一九七五年所作嘅油畫《濱海城市（青島）》，二○一一年喺北京保利春拍時，以超過三千萬人仔成交。今次再拍，保利中國及亞洲現當代藝術專家余箐憫希望大家唔好俾三年前嘅「天價」嚇親，料估價由高位回落。
保利春拍將於下月六至七日喺君悅酒店舉行，全部超過二千三百件拍品，總估價約八億元。
■保利舊年將名畫當垃圾丟一事，登上《蘋果》頭版。 防止名畫再變垃圾
舊年春拍時，保利香港擺個大烏龍，一幅成交價二千八百七十五萬元嘅彩色水墨畫《山色蒼茫釀雪天》，唔小心被清潔工人當垃圾運走，估計幅畫應該喺堆填區頤養天年。
保利香港執董張益修噚日喺春拍預展上，被問到呢件瘀事，不免有少少尷尬。佢強調，公司訓練員工處理拍品同保安程序，一向跟國際拍賣行嘅標準睇齊，只係「有些意外不可避免」，以後會更加謹慎、專注，「應該不會有相同的狀況發生」。上述作品嘅畫家崔如琢今年仍然有專場，仲有跟保利香港合作。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文