魚樂無窮：從蛛絲馬跡搵爆升股
■冠忠巴士有十七厘息墊底，點計都值博。圖為集團主席黃良柏。 資料圖片
大股難玩，二三線股耀武揚威，升幅以倍計嘅多不勝數，當然，你同我都唔係幕後人士，要捉中只能靠市場公開資訊嘅蛛絲馬跡。上周推介卡撒天嬌（2223），無端白事批股果然有嘢，一個禮拜升咗七成。今日推介冠忠巴士（306），有權做其翻版。
「隻冠忠市值廿億唔止喎，點會有人洽購呀？」推介得當然有理由，冠忠月初宣佈，慶祝成立五十周年，大派特別息每股0.8元，以發行股數4.6億股計，涉及金額3.7億。睇睇盤數，最新手頭現金連存款，咁啱又係3.7億，意味今次一炮過將茄殊派曬出街。問題來了，公司短債超過八億，邊個埋單？時光倒流到舊年，原來冠忠有過股權變動，大股東黃良柏向家族基金及新世界系，以每股2.3元購回股權，最新持股五成，意味今次派特別息，佢可以淨袋近兩億。
先將街貨收齊，然後再把手頭現金派盡，剩番一身債，一連串動作，好難唔令人聯想到賣殼。冠忠除專營大嶼山巴士線外，還包括非專利巴士出租服務，以及中港旅遊及酒店服務。近期水貨客事件熱爆全城，證明兩地交往密不可分，冠忠業務包括兩地交通、住宿及旅遊，絕對係頂級肥豬肉，賣盤肯定大把人爭，從呢個角度出發，廿億市值突然變得好渺小。現價入場等併購，有十七厘息墊底，點計都值博。
唐牛
https://www.facebook.com/tongcow88
唐牛
魚樂無窮 - 唐牛 舊文