一周三件：IGG叫緊三飛
■蔡宗建任主席的IGG，盈利增長8.5倍，正申請轉主板，前景亮麗。 資料圖片
IGG（8002）有靚仔業績支持下，正係申請升格轉主板，而集團家陣煲緊條LINK，一掂檔，估值會係上百億元計數，潛在增值勁肥仔。
IGG啱啱公佈上年度成績單冇耐，盈利一支箭增長8.5倍到近5.2億元，集團主打城堡爭霸手遊，喺十四個國家當中，名列前五名，兼喺三十三個國家，名列前十名位置。嚟緊日子IGG喺城堡爭霸穩定收入同客戶基礎上，計劃到今年底，再推出超過三十款手遊，其中一個手遊撲中，又掂過碌蔗。
憧憬分拆LINK上市
仲吸引嘅係，去年八月IGG通訊社交軟件LINK上線，據報載，LINK測試持續半年到一年時間，到時唔排除會獨立分拆上市。LINK家陣每月新增用戶約一百萬，按同業參考，若LINK客戶上到一億咁計，估值上到十億到十五億美金。以上限參考計計數，估值可上到一百一十七億元，係IGG市值五十三億元嘅兩倍！
又IGG本身手遊用戶社區，由全世界超過2.1億用戶賬戶組成，包括每個月二千一百七十萬名活躍用戶，呢個base唔係嘢少，LINK用戶增長，又有多一個優勢。亦諗到，IGG若果煲得掂呢條LINK，未來增值可大可小！
咪扯咁遠，IGG喺去年相對大嘅盈利基數底下，場內專業評估，集團今年EPS0.43元，仍然有近13%增長，預測PE得8.9倍。場內聯眾（6899）今年預測十二倍PE、祖國掌趣科技七十六倍、奧飛動漫六十五倍，IGG平咗一大截。又IGG手頭淨現金高達十四億元，有超級銀彈用嚟發展。呢轉買IGG，先煲轉主板，再買勁抵搞PE，中線少少，博LINK成功分拆，IGG現價（3.90元）翻半番到5.8元計，PE先得十三倍幾，仲未有耐追到祖國行家。
錢雋
細價股專家
本欄逢周二、三、五刊出
錢雋
一周三件 - 錢雋 舊文