陸羽仁 BLOG 2015年3月24日
中國買大細
2015/03/24 09:30:19
網誌分類: 經濟
美股昨日衰收尾，收市前唔夠半個鐘腳軟，由升轉跌，不過跌幅輕微。杜指跌12點，收市報18116點；標普500指數跌4點，收報2104點；納指跌15點至5011點。
美股繼續受美元匯價拉扯著，美元匯價回軟，美股走勢向上。昨日，美元匯價繼續回調，反映美元兌6隻主要貨幣匯價的美元指數再跌1.5%，兌歐元則跌至1.09美元。美股早段造好，不過，美元下跌的同時，又到以美元計價的大宗商品例如油價造好，紐約原油昨日由最低的每桶42.75美元反彈上47.45美元。油價昨日一度插低至42.75美元，主要原因係產油國沙地在上周末話，唔可一味用減產來保護價格。美元轉弱，油價反彈，能源股造好，但運輸業成本首當其衝，杜瓊斯運輸板塊（Dow transport）收市跌近2%，拖累大市收跌。
美元匯價近期左右著大市，對於美匯的強勢將會持續幾耐，遂成為市場熱話。高盛上周發報告預測歐元到9月將跌至1歐元兌換1美元，2017年內更將跌至80美分。據高盛的預測，美元強勢不單止未完，仲有排升。換言之，唔單美股，連港股都無運行啦，從經濟角度，港元相對外幣強，旅遊出口業都受影響。而港元又會相對美元轉弱，資金外流炒歐股日股，港股都唔會有景。
不過，匯豐銀行上周四發表有關美元走勢嘅報告，又唔係咁睇。匯豐認為美元長達8月的漲勢很可能就要告一段落了，主要原因係美國經濟的基本面已經不足以支持美元繼續走強。從技術角度而言，歐元和日圓貶值程度都已經超過了美元在第一輪和第二輪量化寬鬆期間的20%。據匯豐的計算，美元現在已經成為全球排名第二的高估貨幣，僅次於瑞士法郎。預期歐元將在今年年底之前就會反彈，2017年將回升至1.20美元。
不過，匯豐報告亦指出，期間或者仍會有一些潛在風險可能會令美元的強勢保持更長的時間，例如希臘脫歐，新興市場貨幣危機，又或者日本央行犯下重大政治錯誤等等。但這些風險主要還是外部的，與美國國內基本面的變化無關。
在高盛和匯豐兩者之間，我擔心高盛講啱多啲，就係美元持續走強，出現此前題是美國持續慢慢加息，但美國經濟頂得順一直好轉，咁美元就會持續強勢，對商品和港股都有壓力。
商品市場前景另一個因素睇中國經濟前景。過去的十幾年，中國以「世界工廠」稱霸全球，從蘋果iPhone到帆布鞋，再到各種家居用品，統統都是中國出産。那段時間內，中國成為了全球商品需求的最關鍵驅動力，令到多種商品進入一個長期的大牛市。
但近一兩年，隨著中國經濟活動放慢，中國商品需求趨於疲軟，各種商品價格都跌到近年新低。由於此前的無度擴張，造成中國環境遭受的重大破壞、嚴重的工業産能過剩、以及過度投資造成的債務危機，已經令到阿爺在別無選擇的情況下，要改革產業結構。這個舉動，味意著增長速度的減緩。
據花旗的計算，中國要開始再平衡，讓投資在生産總值當中的比重，從目前的50%降低到40%，投資增長速度必須比生産總值增長速度低大約4個百分點。換言之，中國的增長目標是7%，投資增長速度將是3%。當考慮到中國在大多數工業原料總需求中佔據的比例，全球商品需求注定會因此受到重大影響。對於中國本身比較缺乏的原材料，例如鎳和鉻，處境仲會好啲，而供應過剩的商品，例如煤、鋼和鐵礦石，將成為最大的輸家。對於上述嘅股票，大家真係要小心。
花旗指出，過去市場總係緊盯着中國，現在，則必須比較重視所謂「新興五強」，即印度、東南亞、中東、拉丁美洲和非洲的需求。問題係，要她們頂替中國過往的角色，即使全部加埋一齊，有排都追唔上中國。
花旗睇淡中國，但我覺得中國開大開細，要看結構調整是否成功，她現在減少投資在經濟中的比例，向創新產業和內需轉移，的確令商品需求的增長放緩，但只要濟唔死，商品供應在低位可以尋得平衡。另一關鍵是中國的大龍鳯「一路一帶」計劃，若然成功，亞洲基建投資將大增，會重新投動商品需求，而家連死敵日本，都話考慮加入中國搞的亞洲投資銀行，就知無人敢睇死中國的一路一帶計劃唔掂，所以商品行情衰多一年，可能隨著一路一帶計劃啟動，會慢慢恢復。
陸羽仁
回應(8) 我想回應
陸羽仁 BLOG 舊文