中環在線：信置兩少爺齊搞環保
推出空氣淨化巴士站
■空氣淨化巴士站要用電至可以運作。
近年好多富二、三代陸續加入家族企業學接棒，佢哋學做生意之外，亦十分重視企業形象同埋企業社會責任（CSR），於是各適其適，出錢出力支持本地藝術、環保、保育等活動，信和置業（083）第三代黃永光（Daryl）與細佬黃永龍（David）似乎比較鍾意推動環保，新近推出一款空氣淨化巴士站。
信置主要係賣樓，Daryl兩兄弟忽然與奧雅納工程顧問共同研發空氣淨化巴士站，實在係風馬牛不相及。
研發太陽能版本
David就解釋，佢三年前從美國大學畢業回港後，一直有鼻敏感，家人為佢喺家中與寫字樓擺放空氣清新機。咁啱佢見哥哥舊年推動研究大廈水力發電，於是喺半年前開始構思研發呢個空氣淨化巴士站，純粹為推動環保，想幫大家呼吸新鮮空氣。
矛盾嘅係，呢個空氣淨化巴士站雖然話可以有效減少空氣汙染物濃度平均40%，之但係，成個系統係要用電先至可以運作，咁咪一樣唔環保囉？David似乎料到有此一問，即刻話佢哋已經研究緊第二代，希望第二代可以加上太陽能板，方便以太陽能發電。
暫時佢哋投資咗60萬元落呢個研究，Daryl透露，一個空氣淨化巴士站嘅造價大約13萬元，呢個巴士站𠵱家放喺旗下灣仔新盤囍滙地盤裏面，繼續進行數據分析，佢希望將來可以跟政府部門或者巴士公司合作，佢哋𠵱家就為呢個設計申請緊專利。
【話你知】
呢個系統將空氣由置於底部嘅入風口抽入過濾裝置，清除空氣中微細懸浮粒子，淨化後嘅空氣由頂部出風口排出（箭嘴示）。巴士站設計形成屏障，可阻止汙染物進入。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文