魚樂無窮：揭博雅盈利爆升之謎
■博雅主打網絡棋牌遊戲開發及運營。圖為集團主席張偉。 資料圖片
甚麼是慣性消費？例如想食漢堡包，大部份人一定會諗起麥當勞，而唔係SUBWAY。麥當勞最近有乜新產品，九成九都知道係將軍漢堡，SUBWAY呢？冇人知囉。證明市場領導地位一旦確立，版圖夠闊，就算產品好易抄，熟客仔都唔會輕言移情別戀。今日推介嘅手遊股博雅（434），正正係呢個市場現象嘅既得利益者。
博雅主打網絡棋牌遊戲開發及運營，最出名及煞食嘅，莫過於德州撲克及鬥地主。市場主流意見認為，呢啲game好簡單，要抄襲話咁易，市場佔有率好難維持。不過，博雅就完美示範龍頭優勢──去年盈利喪升一倍，付費玩家、活躍用戶有增無減。無他，根據專業報告，按2012年蘋果App Store移動棋牌類遊戲類別收益計，博雅喺中國、香港及泰國乃一哥，台灣亦排行第二，難怪在高基數下，依然有可觀升幅。亦因如此，公司接觸到嘅客戶一定夠廣，去年連環入股四家互聯網公司，講明要催谷新遊戲，未來肯定豬籠入水。
睇基本因素，博雅現價市盈率11倍，與同業IGG（8002）相若，但PB只得2.5倍，平IGG近四成，手頭現金12億，相當於市值近三成，可謂攻守兼備，噚日收市創今年新高，成功搗破蟹貨區，下一站直指7.5元！
唐牛
https://www.facebook.com/tongcow88
唐牛
魚樂無窮 - 唐牛 舊文