金融High Tea 2015年3月27日
大鱷互噬
2015年03月27日
美股調整，內地股市就好淡爭持，港股牛皮偏軟，不過就再出現大鱷互噬場面，被唱衰的浩澤淨水(2014) 股價急插再飆升，股民睇到眼都花。
遭沽空機構Glaucus Research唱淡的浩澤淨水反駁指控，更勁一招係講明高盛及其他股東承諾在90日內不會出售股份，同時有回購股份計劃，股價復牌一開市就係最低的2.15元，比停牌前插18%，但十五分鐘內急彈，之後橫行，全日收報3.01元，比停牌前仲要高14.5%。若一開市頂唔順沽咗，隻股最後比低位大升48%，真係自殺都得啦。
華洋炒作 手法不同
今次大鱷互噬緣起2月中，沽空機構Glaucus Research唱淡兼質疑浩澤淨水帳目的可信性，指控包括懷疑公司嚴重誇大銷售、生產及利潤，又質疑集團旗下淨水租賃業務由另一公司經營時錄得虧損，但浩澤回購後市值竟高達62億元。
喺唱衰兼沽空襲擊下，浩澤股價急瀉後停牌。浩澤日前逐點駁斥六大指控，試圖挽回投資者信心，從集團股價表現睇，估計空軍仲未平晒倉，好友夾淡倉的行動仲進行中。
調研機構先偵查後沽空，係外國對沖基金慣常搵食方法，主要係外國股份流通量高，一旦報告惹到基金跟進，沽空者就可以低位平倉，甚至平完再沽到突，公司係股價跌到體無完膚後，隨時就咁玩完，沽空都食大滿貫。
不過，內地大戶炒股方法，同外好唔同，佢哋興大班人圍炒一隻股票，好多時唔理公司盈利好壞，總之你炒我炒，我炒完交俾你，你炒完又搵人接，喺咁情況下，睇住基本因素去沽空的基金，要平倉就無咁容易，出現華洋大鱷拗手瓜的局面。最經典係隻漢能薄膜發電(566) ，佢話有好多街貨你都唔好信，係咁夾空倉，搞出一場千億市值的大龍鳳。不過公司俾呢啲沽空機構搞完，好易變咗暗傷，所以投機炒作要轉身夠快，長線投資就要認真諗過。
美股顯著調整，港股算係企得穩，低開百幾點後撐住，恒指收報24497點，跌31點；國企指數收報11919點，跌49點，成交金額832億元。長和(001) 同和黃(013) 繼續向好，前者再升1.5元，造156.2元，和黃追落後，報收107元，升1.3元。蒙牛(2319) 去年多賺44%，摩通讚業績有驚喜，全日大升近10%，造38.7元，為表現最叻藍籌。
中銀香港(2388) 公佈業績後，瑞銀發表報告指出，集團去年業績符預期，淨利息收入略高於預期，受惠將過剩的離岸人民幣流動性掉回內地銀行間市場獲利。由於內地進入減息周期，令離岸人民幣及在岸人民幣的息差收窄，將會壓低利潤。
博鰲開壇掀動基建股
報告指，有報道指中銀計劃出售南商銀行，是其策略方向檢討的一部份。中銀或需轉移集團焦點，由以往吸引資金流入內地，改為協助資金由內地流向亞洲地區，因而需要併購及擴大集團於香港以外的業務。瑞銀維持「中性」評級，目標價由27元升至27.5元。中銀香港股價創咗一年新高28.15元，收報27.8元，相信高位可能要消化一下。
博鰲亞洲論壇開幕，市場普遍認為，一帶一路規劃的具體實施方案，包括詳細的重大工程項目清單等，將在此次論壇上亮相，相關概念股大漲。在基建股推動下，上證指數收報3682點，漲21點；深成指收報12712點，跌44點。兩市合計成交接近1.12萬億元人民幣。
要留意係以增長股為主的創業板被狂沽，暴瀉4%，收報2291點。創業板跌得多，一來係反映美國科技為主的納斯達克指數早一晚明顯調整；二來都係顯示A股日前錄得十連升，真係升得幾急，所以一有回吐，個勢可以幾急下。
陸羽仁
金融High Tea 舊文