魚樂無窮：
一隻炒高五成盈警股
■利福地產全月累計升五成。圖為集團執行董事陳楚玲。 資料圖片
美國就業數據靚爆鏡，今次輪到淡友主場，息魔成為股市主旋律，道指失守萬八，夜期跌穿二萬四，牛仔今日難免一死。不過好友唔使灰心，近年股市係大型上落市，跌市反而要趁低吸納，唔好唔記得，阿爺上月底先減完息咋！
前輩教落，好消息係用嚟出貨，壞消息乃掃入之時，放諸大市及個股皆準！利福地產（2183）二月初公佈，由於投資物業公平值錄得虧損，加上未有出售物業收益，全年業績將轉蝕最多千四萬。奇就奇在，利福地產往後不跌反升，上周五更炒高14%，全月累計喪升五成！究竟甚麼葫蘆賣甚麼藥？睇番中期業績報告，利福地產主業雖未如理想，但家底十分豐厚，手頭現金達6.1億，相對市值8.3億，含金量高達73%，說穿了又係聰明錢作怪。
再加少少想像力︰利福地產前年由利福國際（1212）分拆出來，後者去年底股權有變，與新世界（017）正式分家，大股東劉鑾鴻持股增至五成。阿媽執靚個檔，照計應該輪到阿仔。睇真啲，利福地產旗下投資物業全部空置，唯一位於瀋陽嘅開發項目仍未動工，家陣殼股搶手到暈，內房殼仲有分加，劉生作為一個精明生意人，肯定清楚過你同我。再睇NAV，嘩！每股值4.19元，現價1.98元，變相五折大平賣，其他內房殼全部炒緊幾倍PB。利福地產潛力有幾大？用計數機都有排篤囉。
唐牛
https://www.facebook.com/tongcow88
唐牛
魚樂無窮 - 唐牛 舊文