魚樂無窮：長毛坐鎮利民演好戲
■股壇長毛David Webb揸住嘅利民實業終於浮上水面，值得留意。 資料圖片
名人增持動作，對股價往往起著實質作用，無他，冇投資價值嘅嘢，點會真金白銀落注吖。近期最佳例子，一定係超人李嘉誠，日前首度增持重組後嘅長和（001），即連續兩日造好。不過，更吸
引唐牛眼球嘅，係股壇長毛David Webb揸住嘅利民實業（229），終於浮上水面。
根據聯交所權益披露，David Webb喺6月9日，以平均價1.072元，增持52萬股利民，持股量由原來嘅4.92%，增至5.03%。
值得留意嘅係，當日利民已除淨，意味增持股份冇息收，究竟有乜吸引到David Webb勇猛掃貨呢？
有跟開本欄嘅戰友，都知利民喺呢度曝光率不低，好嘢唔怕講多幾次︰1.一輪急升後，現價息率仲有6厘，加上過去無間斷派息紀錄，啱曬食息一族。2.最新市值僅6.3億元，剛好等同資產淨值，當中有2億元係淨現金，財務狀況一流。三大股東持貨逾五成，主席黃乾利今年79歲，主打家用電器業務簡單，集齊賣殼有利條件。
事有湊巧，David Webb對上一次披露持貨逾5%股權嘅股份，就係一度宣佈洽售控權嘅鱷魚恤（122），雖然最終無疾而終，但現價較David Webb入市價已高出1.8倍。利民噚日一棍創九年高位，唔通今次好戲會再度上演？
唐牛
https://www.facebook.com/tongcow88
唐牛
魚樂無窮 - 唐牛 舊文