智取大市：博牛三下半場開車
上星期四下晝，晉佳等唔切發叔返嚟，就喺facebook page交代睇好港股轉強。上星期五滬綜指插足6%，恒指仲可以微升，整體港股升跌比例1：2，未見全面下跌，就反映港股免疫能力正在增強，後市唔似有條件急跌，冇特別因素可以推低港股，自然就要開始回升。港股4
月9日嘅主板成交破紀錄達到2,915億元；喺4月13日，恒指9日RSI上衝至94.8極度超買水平；加上港股近期轉強，後市一浪高於一浪機會偏高；晉佳以呢三個現象，去假設港股維持喺牛三mode。
如果參考最近三次牛市三期，分別係1996年9月至1997年7月、1999年10月至2000年3月、同埋2007年8月至10月，當中除咗2007年恒指喺兩個半月內急升六成外，1997同2000年嘅牛三，都能形成兩次RSI雙頂背馳，中間往往出現技術調整，同而家情況相若。因此，只係牛三預測準確，而家港股就係剛步進下半場。
要量度牛三下半場會升幾耐？先參考1997年，牛三上半場為時4個月，調整大約兩個月，然後再出現4個月牛三下半場。
2000年一役，先出現牛市上半場兩個半月，調整不足一個月，再有牛市下半場兩個月。今次港股牛三，上半場由3月12日升到4月27日，為時只有個半月，然後進入大約個半月調整。如果參考1997年同2000年牛三下半場嘅長度，同上半場相若嘅話，今次牛市下半場，亦應該同上半場嘅個半月差唔多，即係牛三估計玩到8月初左右。
四個選擇食盡升浪
雖然市底好轉，但係除咗細價股保持鑊氣之外，二三線股升勢未成形，所以未睇得出乜嘢板塊會係下一浪升市嘅強勢股。
晉佳暫時列四類股有機會成進攻重心。第一類大市槓桿股，如港交所（388）、惠理集團（806）、華富（952）等，大市升成交多，自然跑贏大市，唔使多解釋。
第二類選擇，係超低殘圓底股，例如金屬股鞍鋼（347）、馬鋼（323），剛發盈警嘅龍工（3339）等等，呢批股月線圖出現圓底，仲要近期股價已調整兩至三成，有曬靚位供各位上車，嚟緊破頂機會偏高。
第三類選擇係股價剛突破、成交開始增加，距離今年低位升幅未夠兩倍嘅細價股。因為牛三當中，當炒細價股升唔夠兩倍唔叫做升，亦代表仲有上升空間。
第四類選擇，就係預留部份資金，等新強勢股，呢一刻，要買，但毋須一下子將子彈耗盡，最好嘅股好快會出現。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文