金融High Tea 2015年6月23日
北水左右大局
2015年06月23日
內地無市，加上之前A股出現小股災，市場普遍預期低開，結果個市又無啲人想像咁差，開市無耐就回升，下午愈升愈多。對於港股突然有靚仔表現，陸羽仁就以平常心去睇。
內地無市，港股向好，下晝仲愈升愈多。我覺得港股造好有兩個原因，一個係內地
無市，市場唔使理A股住，指數繼續彈吓先囉，下晝輪到希臘債務出現曙光，歐洲股市開市急彈，港股升幅跟住擴大，收市升成三百幾點，照咁睇港股本身可能本來係彈番百零點，趁住歐債危機紓緩贈興再升多兩百點。
港匯再度轉強
不過，如果睇埋成交，個市埋單唔係一千億，顯示大陸無市，加上呢排北水唔係咁多落嚟炒作，令港股都唔係咁壯旺，所以指數彈得多，暫時唔可以當係市底好番晒。
再睇埋隻港交所(388) ，只係升0.4元，升幅落後大市，都係個市未似大好的跡象。港交所跑輸大市，多少同大摩發表報告，將港交所(388) 剔出該行「亞太最佳名單」(Best Ideas List)有關。
大摩重申對港交所「增持」投資評級(按未來12個基礎)，料中港兩地股市增加互聯互通，將可推動大市成交額增加，未來潛在催化劑包括大型機構投資者參與、證券衍生工具、MSCI指數或納入A股等因素，但短期而言催化劑有限，料夏季市場交投仍會呆滯(Summer lull)，即係話大摩保持外資偏淡論調，估計短期個市仲唔會好旺。要留意係港匯進一步轉強，唔知係咪有水流入，若然再有北水流入，咁大摩就未必一定啱啦。
除了改變港交所評價，大摩最新的「亞太最佳名單」有7隻股份，在本港上市有新奧能源(2688) 。
喺內地休市，港股唱獨腳戲下，恒生指數收造27080點，升320點；國企指數收報13383點，升197點，成交由上周五的1406億元，大幅縮至906億元，今日A股復市，睇吓交投會唔會多番嘞。由於中資股唔算活躍，昨日升市主要由友邦(1299) 加隻騰訊(700) 帶動，兩股合力為恒指進貢101點。中車(1766) 入股中國置業投資(736) ，中國置業估計全年虧損幅度大減，可惜股價仍急跌，全日大跌24%，成為表現最差港股；中車則升0.2元或1.72%，收11.8元。
中國置業跌得甘外，另一隻急瀉得來有故講嘅係香港電視(1137) ，佢收報2.45元，急跌7%。佢逆市回落，市場解釋係主席王維基上周突然表示，電視無得做，尤其經過立法會事件，對電視業務發展感到渺茫。王維基咁講，可能同港視手頭庫存劇集所剩無幾有關。
港視小股東要戴頭盔
既然可播劇集有限，公司一係再擲資源拍片，一係就減產甚至停產，但拍劇喺網播要維持收視證明唔易，搵錢仲更加難，王維基唔想再燒錢，自然就要畀市場有心理預期。香港電視由賣固網搞電視開始，陸羽仁都係傾向睇淡，建議小股東有機會收錢最好都係收咗錢先，到?家都仲係維持呢個睇法，可惜就係?家離場，已經收少好多。呢個故事說明，投資係一條孤獨道路，千萬不可以頭腦發熱，尤其有些塘邊鶴拍晒手叫你去馬，話你英明神武，咁就要加倍小心，特別係做小股東，威又無得威，有疑問點解唔先去戴頭盔？
呢排好多新股爭上市，可惜令捧場客失望者多，例外係上周五掛牌高收16%的百信藥業(574) 昨日狂飆55%，升幅是港股最勁，比招股價1.22元，高出80%，真係唔聲唔聲，嚇你一驚。
陸羽仁
金融High Tea 舊文