金融High Tea 2015年6月12日
反轉嚟炒
2015年06月12日
新沙士暫時證實係虛驚，加上外圍造好，港股跟隨反彈。港股早兩日咁快插穿兩萬七千點關口，有反彈唔出奇，但壞消息係咪已經反映晒，仲要睇多兩日至知，如果想走短線，都係先忍手穩陣。
新沙士未可安枕
多宗疑似新沙士個案，昨日證實都係流料。前日個市借消息大
插，回頭睇番有人會話反應過敏。疑似沙士個案定義係14日內去過南韓、出現發燒感冒癥狀，咁就要通知醫管局，個定義咁鬆，實有好多疑似個案。不過，市場對啱啱出現的消息，反應通常都會大啲，甚至走向極端，做定最壞準備。家多宗疑似個案都證明係流料，但唔代表可以安枕無憂，因為疫症喺南韓爆發未停，兩地往來頻密，好難擔保無人會中招。關鍵係香港點樣處理，能否有效防止傳播，呢樣暫時仲係未經測試，所以短期呢個因素仲會壓住個市。
另一樣就係政改，家好多人都話方案通過機會好低，有人放出風聲話一旦否決港股會插，政改在17日(下周三)呈上立法會，高人話畀陸羽仁聽，政府同泛民都唔想拖，政府會爭取18日(下周四)投票，即係話過抑或唔過，大約仲有一個星期時間就知，政府高層估計好大機會唔過。
對於政改點樣影響個市，陸羽仁唔會死牛一邊頸，覺得否決咗會升又或者跌，最緊要都係睇當時個市係乜水位，同大戶點部署，如果個市先前造好，一話否決咁插低絕對唔奇，但如果個市已經回落較多，咁再造低水位有幾先？我係大戶就會諗諗反轉嚟炒，壞消息出時好多人沽貨，佢就平淡倉兼反手炒上都唔奇。
昨日個市彈而不熱，恒生指數收造26907點，回升220點；國企指數收報13743點，漲126點，但交投縮減至1243億元。內地保險股表現突出，財險(2328) 是升幅最大國企指數成份股，收造18.22元，揚5%。
股仔方面，易通訊(8031) 控股權易手予「舖王」鄧成波，復牌後爆升23%；星美(198) 引入百度等股東，股份應聲抽高，全日收造1.04元，炒高18.2%，炒名牌效應玩完一輪，唔係升得咁勁，似乎有小小跌Watt跡象。另外，三生製藥(1530) 首掛，全日收9.35元，較招股價9.1元，高0.25元，又係超購多升幅小的例子。
六月暑假檔期，發展商開始推盤，焦點當然是何文田樓王盤，呢個盤當年拍賣創晒紀錄，但都無諗過日後可以賣到三萬幾銀一呎，一個千呎單位賣三千幾萬。有中環茶友笑言，香港邊度咁多有錢佬呢？自己平時真係失覺晒囉。
除咗何文田樓王盤，將軍澳新盤昨突擊開價，發展商為增加項目叫座力，提供樓價及辣稅優惠，最高可逾一成四，折實平均呎價12837元，入場價約476萬元，睇嚟發展商都想喺其他人賣樓前先鎖定客源。
深地產吸引過港地產
過去大盤應市，地產股多數聞風先動，但呢排唔知係因為撞正六絕市調整，抑或係樓價Too good to be true(好到你唔信)，地產股都唔係點郁。茶友話，好多代理同佢講叫佢快快入市，因為股市升完樓價就升，茶友就話，股市風光正好，我唔捨得咁快套股買樓喎！何況連恒基李四叔都話買股抵過買樓啦！
樓市方向唔係升就係跌，但從來唔易睇，好似呢屆政府上台，好多人估樓價會跌，點知就屢創新高，家好多人驚樓價繼續升無得上車，就算覺得好貴都逼上車，但9月份美國加息機會漸增，樓價係咪真係能夠長期反地心吸力，好快就見真章。不過，如果學內地流行講「性價比」，一水之隔的深圳，由於產業前景獲看好，呢排吸引不少資金買樓，升勢比港樓勁好多，所以如果要買地產股，係咪深圳概念吸引啲呢？
陸羽仁
金融High Tea 舊文